سیکورٹیز اینڈ ایکس چینج کمیشن نے اردو کے نفاذ کے لئے جامع حکمت عملی کی منظوری دے دی

جمعہ 11 ستمبر 2015 21:01

اسلام آباد (اُردو پوائنٹ اخبار تازہ ترین۔ 11 ستمبر۔2015ء) قومی زبان اردؤ کے نفاذ کے لئے وفاقی حکومت کی ہدایات کی روشنی میں سیکورٹیز اینڈ ایکس چینج کمیشن آف پاکستان نے ادارے میں اردؤ کو رائج کرنے کیلئے ایک جامع حکمت عملی کی منظوری دے دی ہے۔ایس ای سی پی کے چئیرمین ظفر حجازی کی سربراہی میں ہونے والے کمیشن کے اجلاس میں ایس ای سے پی سے متعلقہ تمام قوانین، قوائد و ضوابط، ریگولیشن کے اردو زبان میں ترجمعے کے لئے ایک خصوصی محکمہ بنانے کی منظوری دے دی گئی ہے ۔

مزید ازاں،کمیشن نے فوری طور پراردو کو دفتری زبان قرار دیتے ہوئے ہدایات جاری کی ہیں کہ تمام افسران و ملازمین روزمرہ کے اجلاسوں ، سیمیناروں ، قانونی کارروائیوں کی سماعت اردو میں کریں گے ۔ یہ بھی فیصلہ کیا گیا کہ ایسے سامعین کے ساتھ اعلی سطحی اجلاسوں میں جو کہ اردو نہ سمجھ سکتے ہوں، متراجم کو ساتھ رکھا جائے گا ۔

(جاری ہے)

کمیشن نے یہ بھی فیصلہ کیا کہ ایس ای سی پی کی کمپنیوں اور دیگر تمام قسم کے بیرونی شراکت داروں کے ساتھ بھی اردو میں مراسلہ نگاری شروع کی جائے گی۔

اس بات کا بھی فیصلہ کیا گیا کہ ایس ای سی پی کی تمام دستاویزات میں خط نستعلیق کا استعمال کیا جائے گا ۔ اس کے علاوہ کمیشن نے ایس ای سی پی کی اردو زبان میں سرکاری ویب سائٹ بنانے کے بھی منظوری دی۔اس موقع پر ایس ای سی پی کے چئیرمین ظفر حجازی نے کہا کہ ملک میں اردو کے نفاذ سے متعلق عدالت عالیہ کا فیصلہ تاریخ ساز ہے۔ انہوں نے تمام دیگر کمشنروں اور ملازمین پر زور دیا کہ وہ اردو کے نفاذ کو یقینی بنانے کے لئے بھر پور اور مکمل ایمانداری کے ساتھ کوشش کریں۔ انہوں نے کہا کہ بانی پاکستان قائد اعظم محمد علی جناح کا یہ یقین تھا کہ اردو ہی وہ زبان ہے جو کہ اس ملک کے باسیوں کو ایک لڑی میں پرو کر رکھ سکتی ہے۔

اسلام آباد میں شائع ہونے والی مزید خبریں