پاکستان سے ہوم سیریز ، زمبابوے نے ٹی ٹوئنٹی اور ون ڈے سکواڈ کا اعلان کردیا

منگل 15 ستمبر 2015 12:46

ہرارے (اُردو پوائنٹ اخبار تازہ ترین۔ 15 ستمبر۔2015ء )زمبابوے کر کٹ بورڈ نے پاکستان کے خلاف ہوم سیریز کیلئے ٹی ٹوئنٹی اور ون ڈے سکواڈ کا اعلان کردیا، دو ٹی ٹونٹی اور 3 ون ڈے میچز کیلیے وکٹ کیپر بیٹسمین رچمونڈ موتمبامی کی واپسی ہوئی ہے، انھیں بھارت کے خلاف ہوم سیریز میں مایوس کن پرفارمنس پر ڈراپ کردیا گیا تھا، گذشتہ ماہ نیوزی لینڈ کے خلاف سیریز میں وکٹوں کی نگہبانی ریجس چاکابووا نے کی تھی مگر اب پھر گلوز موتمبامی کو تھمانے کا فیصلہ کیا گیا ہے۔

پاکستان کے خلاف سکواڈ میں فاسٹ بولر تاوٴرائی موزارابانی کو بھی شامل کیا گیا ہے جوکہ اب تک تین ٹونٹی 20 میچز کھیل چکے لیکن ون ڈے ڈیبیو نہیں کیا ہے۔ پاکستان ٹیم 24 ستمبر کو ہرارے پہنچے گی جہاں پر پہلا ٹی ٹونٹی تین دن بعد کھیلا جائے گا۔

(جاری ہے)

دونوں ممالک کے درمیان تین ون ڈے میچز یکم سے پانچ اکتوبر کے دوران کھیلے جائیں گے۔ کنوینر آف سلیکٹرز کینون زیہلی کا کہنا ہے کہ ہم نے سکواڈ کارکردگی کی بنیاد پر متنخب کیا جس میں نوجوان کھلاڑیوں کو صلاحیتوں کے اظہار کا موقع فراہم کیا گیا ہے۔

سکواڈ میں کپتان ایلٹن چگمبرا، چھامو چھیبابا، گریم کریمر، کریگ ایروائن، لیوک جونگوے، نویل مدزیوا، ہیملٹن مساکیڈزا، کرسٹوفر ایم پوفو، موتمبامی، موزارابانی، جان نیومبو، تناشے پانیانگرا، سکندر رضا، پراسپر اتسیا، میلکم والر اور سین ولیمز پر مشتمل ہے۔

اسلام آباد میں شائع ہونے والی مزید خبریں