گوجرانوالہ سے (ن)لیگ کے سینئر رہنماء شیخ اعجازکا ساتھیوں سمیت تحریک انصاف میں شمولیت کااعلان

پی ٹی آئی پنجاب کے صدر اعجاز چوہدری سے صوبائی سیکرٹریٹ میں ملاقات ، عمران خان کی قیادت پر بھرپور اعتماد کا اظہار کیا

جمعرات 9 اپریل 2015 18:05

لاہور ( اُردو پوائنٹ اخبار تازہ ترین۔09 اپریل۔2015ء) پاکستان تحریک انصاف پنجاب کے صدر اعجازاحمدچوہدری سے پنجاب سیکرٹریٹ میں ضلعی صدر رانا نعیم الرحمان اور سینئرنائب صدر قاسم اکرم وڑائچ کی قیادت میں گوجرانوالہ سے وفد نے ملاقات کی ، اس موقع پر گوجرانوالہ کی اہم سیاسی شخصیت اور مسلم لیگ (ن) کنٹونمنٹ بورڈ کے سابقہ وائس چیئرمین شیخ اعجاز نے اپنے ساتھیوں سمیت تحریک انصاف میں شمولیت کااعلان کیا اور چیئرمین عمران خان اور اعجازاحمد چوہدری کی قیاد ت پر اپنے بھرپور اعتماد کا اظہار کیا ، شیخ اعجازنے کہاکہ میں اور میرے ساتھی تحریک انصاف میں اس لئے شمولیت اختیار کررہے ہیں تاکہ عوام کی صحیح معنوں میں خدمت کرسکیں، مسلم لیگ (ن) نے اپنے کارکنوں اور عوام کو سخت مایوس کیا ہے ، عمران خان ہی وہ واحد لیڈر ہے جو ملک میں حقیقی معنوں میں تبدیلی لا سکتے ہیں اوروہی ملک و قوم کوموجودہ بحرانوں سے نکال سکتے ہیں ، اعجازاحمدچوہدری نے نئے شامل ہونے والے ساتھیوں کو پارٹی میں خوش آمدید کہتے ہوئے کہاکہ گوجرانوالہ کنٹونمنٹ بورڈ کے انتخابات میں شیخ اعجازکی پی ٹی آئی میں شمولیت سے گہرے اثرات مرتب ہوں گے اور پارٹی کنٹونمنٹ بورڈ کے انتخابات میں بھرپور کامیابی حاصل کرے گی اور انہوں نے کہاکہ تحریک انصاف کنٹونمنٹ بورڈ کے انتخابات میں ضلعی کمیٹیوں کی مشاورت سے مضبوط امیدوار میدان میں اتارے ہیں ،عہدیداران اور کارکنان ان کی کامیابی کے لئے دن رات ایک کر دیں ، پوری قوم کی نظریں تحریک انصاف پر ہیں انشاء اللہ آنے والا دور تحریک انصاف اور عوام کا ہوگا،صوبے بھر میں کنٹونمنٹ بورڈ کے انتخابات میں تحریک انصاف اپنی کامیابی کے جھنڈے گاڑھے گی ، مسلم لیگ (ن) اور پیپلزپارٹی کو منہ کی کھانی پڑے گی، جوڈیشل کمیشن کے قیام کے بعد (ن) لیگ کے درباریوں کی ٹانگیں کانپنا شروع ہو گئی ہیں، 2015 ء الیکشن کا سال ہے ، اس موقع پر ایس اے حمید، شیخ ندیم اختر ،چوہدری عمر کسانہ ، شیخ نعیم ہاشمی، حسن جعفری سمیت عہدیداران اور کارکنا ن موجود تھے۔

لاہور میں شائع ہونے والی مزید خبریں