’’باتیں ،باتیں اورصرف باتیں ‘‘ عمران خان کا سیاسی منشور ہے،زعیم قادری

لاہور(اُردو پوائنٹ اخبارتازہ ترین - آئی این پی۔14 جنوری۔2016ء) پنجاب حکومت کے ترجمان سید زعیم حسین قادری نے کہا ہے کہ بے جا تنقید اور الزام تراشی عمران خان کا وطیرہ بن چکا ہے -عمران خان کی سیاست مخالفین پر تنقید تک محدود ہو کر رہ گئی ہے -عوام نے دھرنا پارٹی کی لیڈر شپ کی طرز سیاست کو مسترد کر دیا--عمران خان اور پرویز الہی کے بیان پر تبصرہ کرتے ہوئے سید زعیم حسین قادری کہا کہ باشعور عوام عمران خان کی لچھے دار گفتگو کا کوئی اثر نہیں لیتے-باتیں ،باتیں اورصرف باتیں یہی عمران خان کا سیاسی منشور ہے-عوام کام کرنے والوں اور باتیں بنانے والوں میں فرق خوب جانتے ہیں -پنجاب پولیس پر تنقید کرنے والے کے پی کے کے بلدیاتی انتخابات میں پولیس کی مداخلت دیکھ چکے ہیں-اورنج لائن میٹرو ٹرین پر تنقید کر کے عمران خان سیاست چمکانے کی کوشش کر رہے ہیں-قبل ازیں سید زعیم حسین قادری نے پرویز الہی کے بیان پر تبصرہ کرتے ہوئے کہا کہ پرویز الہی دور کے منصوبے کرپشن ،گھپلوں اور اقربا پروری سے بھر پور تھے-وہ اپنی مردہ سیاست چمکانے کی کوشش کر رہے ہیں ان کی سیاست ختم ہو چکی ہے-رنگ روڈ کا منصوبہ بھی پرویز الہی حکومت کی بد انتظامی اور اقربا پروری کا شکار تھا-چوہدری برادران کے دور میں میرٹ کا بری طرح قتل عام کیا گیا-ترجمان پنجاب حکومت نے مزید کہا کہ پنجاب حکومت کی شفافیت کی گواہی غیر ملکی ادارے بھی دیتے ہیں-شفافیت اور گڈ گورننس مسلم لیگ (ن) کی حکومت کا طرہ امتیاز ہے -انہوں نے مزیدکہا کہ شہباز شریف کی موجودگی میں میرٹ کی خلاف ورزی ممکن ہی نہیں ہے۔