بھارتی ہاکی ٹیم کے کپتان سردارسنگھ کے منفی بیان پرقومی اولمپئنزچراغ پا ہو گئے

ہفتہ 16 جنوری 2016 12:51

بھارتی ہاکی ٹیم کے کپتان سردارسنگھ کے منفی بیان پرقومی اولمپئنزچراغ پا ہو گئے

لاہور(اُردو پوائنٹ اخبارتازہ ترین - آن لائن۔16 جنوری۔2016ء) بھارتی ہاکی ٹیم کے کپتان سردارسنگھ کے منفی بیان پرقومی اولمپئنزچراغ پا ہو گئے، شہناز شیخ اور طاہر زمان نے مطالبہ کیا ہے کہ پاکستانی پلیئرز کے خلاف زہرافشانی پرایف آئی ایچ ایکشن لے۔تفصیلات کے مطابق چیمپئنز ٹرافی 2014ء کے سیمی فائنل میں پاکستان اور بھارت کی ٹیموں کے درمیان جو کچھ ہوا اس کی باز گشت ابھی تک سنائی دے رہی ہے، انڈین ہاکی ٹیم کے کپتان سردار سنگھ کے حالیہ بیان نے بھڑکتے ہوئے شعلے کو مزید ہوا دے دی، ان کا کہنا تھا کہ پاکستانی کھلاڑیوں کو اپنے رویے پر معافی مانگنی چاہیئے۔

اس بیان نے پاکستان ہاکی ٹیم کے اس وقت کے ہیڈ کوچ و منیجر شہناز شیخ کو چراغ پا کر دیا، انھوں نے کہا کہ واقعے کے بعد ورلڈ ہاکی فیڈریشن نے ایکشن لیا اورپاکستانی پلیئرز کو معطل بھی کیا جس کے بعد یہ معاملہ ختم ہو گیا تھا، اب سردار سنگھ کے بیان نے اسے پھر ہوا دی ہے، وہ انڈین ہاکی فیڈریشن کے عہدیدار ہیں اور نہ ہی ان کے پاس ایف آئی ایچ میں کوئی ذمہ داری ہے، ہاکی کی عالمی باڈی اس بیان کا سنجیدگی سے نوٹس لے اور ان کے خلاف سخت کارروائی کرے۔

(جاری ہے)

شہناز شیخ نے کہا کہ کسی بھی کھلاڑی کو زیب نہیں دیتا کہ وہ دوسرے ملک کے پلیئرز کے خلاف اس طرح کا بیان دے، بھارت میں کوئی بھی اٹھ کر پاکستان کے خلاف بیان بازی شروع کر دیتا ہے۔ طاہر زمان نے کہا کہ پاکستانی کھلاڑیوں کو آسٹریلیا، جرمنی اور ملائیشیا سمیت دنیا بھر میں لیگز کے لیے بلایا جاتا ہے لیکن بھارت نے انا کی وجہ سے گرین شرٹس کو اپنی لیگ میں شامل نہیں کیا۔ انھوں نے کہا کہ پاکستانی کھلاڑیوں کا نہ صرف نظم وضبط مثالی ہے بلکہ وہ بھارتی پلیئرز سے کھیل میں بھی آگے ہیں

متعلقہ عنوان :

لاہور میں شائع ہونے والی مزید خبریں