انٹرنیشنل ہیومن رائٹس کمیشن کا اعتزازحسن کے لئے بہادری کا عالمی ایوارڈ

اتوار 12 جنوری 2014 17:28

ہنگو(اُردو پوائنٹ اخبار تازہ ترین۔12جنوری۔2014ء)انٹرنیشنل ہیومن رائٹس کمیشن نے خودکش بمبار کو اسکول میں داخل ہونے سے روک کر اپنی جان کا نذرانہ پیش کرنے والے اعتزاز حسن کو بہادری کے عالمی ایوارڈ سے نوازا ہے۔

(جاری ہے)

نجی ٹی وی کے مطابق انٹر نیشنل ہیومن رائٹس کمیشن کے رکن ڈاکٹر شاہد محمد نے ہنگو میں اعتزاز حسن شہید کی قبر پر حاضری دی اور فاتحہ خوانی کی، اس موقع پر انٹرنیشنل ہیومن رائٹس کمیشن کے اہلکاروں نے اعتزاز کے والد مجاہد علی سے بھی تعزیت کی اور انہیں ان کے بیٹے کی شجاعت پر بہادری کے عالمی ایوارڈ سے نوازا۔

قبل ازیں آج ہی انٹر نیشنل کمیونٹی کی جانب سے ایک وفد نے بھی ہنگو میں اعتزاز حسن کی قبر پر حاضری دی اور ان کو خراج عقیدت پیش کیا۔واضح رہے کہ 6 جنوری کو اعتزاز حسن نے گورنمنٹ ہائی اسکول ابراہیم زئی میں خود کش بمبار کو اسکول میں داخل ہونے سے روک کر اپنی جان کا نذرانہ پیش کر کے 1500 سے 2 ہزار جانوں کو محفوظ بنایا تھا۔