دبئی ٹیسٹ میں ہار قومی کھلاڑیوں کی رینکنگ پر بھی اثرانداز، یونس ، اسد اور حفیظ کی تنزلی،بلے بازوں کی درجہ بندی میں ہاشم آملہ چوتھے، چتیشور پجارا پانچویں، کمارا سنگاکارا چھٹے اور مائیکل کلارک ساتویں نمبر پر آگئے ، سری لنکا کے خلاف لگاتار دو میچوں میں ناقص بلے بازی پر اسد شفیق 4 درجے نیچے آگئے ،پروفیسر کو بھی شرمندگی کا سامنا

پیر 13 جنوری 2014 22:30

دبئی(اُردو پوائنٹ اخبار تازہ ترین۔13 جنوری ۔2014ء) دبئی ٹیسٹ میں سری لنکا کے خلاف شکست کے بعد پاکستانی کھلاڑیوں کو رینکنگ میں بھی تنزلی کا سامنا کرنا پڑا ہے۔ انٹرنیشنل کرکٹ کونسل کی جانب سے ٹیسٹ کرکٹ میں کھلاڑیوں کی نئی رینکنگ کا اجرا کردیا گیا ہے جس کے تحت بلے بازی میں جنوبی افریقا کے ابراہم ڈی ویلیئرز کی بادشاہت اب بھی قائم ہے، دوسرے نمبر پر ویسٹ انڈیز کے شیو نرائن چندراپال ہیں جبکہ نیوزی لینڈ کے روز ٹیلر تیسرے نمبر پر براجمان ہیں، بلے بازوں کی درجہ بندی میں ہاشم آملہ چوتھے، چتیشور پجارا پانچویں، کمارا سنگاکارا چھٹے اور مائیکل کلارک ساتویں نمبر پر ہیں، ٹاپ ٹین میں میں شامل پاکستان کے مسٹر ٹک ٹک مصباح الحق اپنی آٹھویں پوزیشن پر برقرار ہیں تاہم سری لنکا کے خلاف پہلے میچ میں سنچری داغ کر نویں پوزیشن پانے والے مسٹر کول یونس خان ایک پھر دسویں پوزیشن پر آگئے ہیں، اس کے علاوہ سری لنکا کے خلاف لگاتار دو میچوں میں ناقص بلے بازی پر اسد شفیق 4 درجے نیچے آگئے ہیں اور رینکنگ میں ان کا نمبر 22واں ہوگیا ہے اور تو اور پروفیسر محمد حفیظ تو تنزلی کا شکار ہوکر ٹاپ ففٹی میں بھی نہیں رہے۔

(جاری ہے)

بالنگ کے شعبے میں بولروں کی رینکنگ میں کوئی تبدیلی نہیں آئی، جنوبی افریقا کے ورنون فلینڈر اور ڈیل اسٹین بدستور پہلے اور دوسرے نمبر پر براجمان ہیں، آسٹریلیا کے ریان ہیرس تیسرے، سری لنکا کے ہیراتھ چوتھے اور پاکستان کے جادوگر اسپنر سعید اجمل پانچویں نمبر پر موجود ہیں، آسٹریلیا کے پیٹر سڈل چھٹے، بھارت کے روی چندرن ایشون ساتویں اور آسٹریلیا کے ہی مچل جانسن آٹھویں نمبر پر ہیں۔

متعلقہ عنوان :