کراچی اسٹیل ملز 200 ارب کے خسارے میں،ناقص حکمت عملی سے قومی خزانے کو یومیہ 7 کروڑ روپے کا نقصان

اتوار 19 جنوری 2014 23:48

کراچی (اُردو پوائنٹ اخبار تازہ ترین۔19 جنوری ۔2014ء) سال2008 تک منافع دینے والی پاکستان اسٹیل ملز اب 200ارب روپے کے خسارے میں ہے، ناقص حکمت عملی سے قومی خزانے کو یومیہ 7 کروڑ روپے کا نقصان ہورہا ہے۔2008 ہی کی تو بات ہے پاکستان اسٹیل ملز سونے کا انڈا دینے والی مرغی تھی، اکاؤنٹ میں 10 ارب روپے کی رقم اور سالانہ 2 ارب روپے سے زائد کا منافع ہورہا تھا۔

(جاری ہے)

پاکستان اسٹیل مل میں 82 فیصد پیداواری صلاحیت پر کام بھی ہورہا تھا لیکن 2008 کے بعد چراغوں میں روشنی نہ رہی۔آج 2014 میں صورتحال یہ ہے کہ اسٹیل ملز مجموعی طور پر 200 ارب روپے سے زائد کے خسارے میں ہے، ماہانہ 2 ارب روپے اور یومیہ 7 کروڑ روپے کا ٹیکہ قومی خزانے کو لگارہی ہے۔ماہرین کاکہنا ہے کہ اسٹیل مل کو منافع بخش بنانے کیلئے کرپشن کا خاتمہ کرنا ضروری ہے، اگر انتظامیہ اہل ہو تو سالوں نہیں مہینوں میں یہ ادارہ اپنے پاؤں پر دوبارہ کھڑا ہوسکتا ہے