گیارہ مئی کو دھاندلی کرنے والوں کے خلاف غداری کا مقدمہ چلایا جائیگا ، عمران خان ،بھیک مانگنے اور قرضہ لینے والوں کی عزت نہیں ہوتی ،وزیر اعظم نواز شریف پاکستان کوغلامی سے نہیں نکال سکتے ،امریکی وزیر دفاع مجھے کوئی دھمکی دیکر جاتے تو طبیعت درست کردیتا ، خیبر پختونخوا کی بجلی کا نظام ہمارے حوالے کردیا جائے توصوبے میں بجلی کی قیمت20 فیصد کم کردی جائے گی ،مجھے اللہ کے سوا کسی کا خوف نہیں،تحریک انصاف کے سربراہ کا خوشاب میں جلسہ سے خطاب

خوشاب(اُردو پوائنٹ اخبار تازہ ترین۔20 جنوری ۔2014ء) تحریک انصاف کے چیئرمین عمران خان نے کہا ہے کہ گیارہ مئی کو دھاندلی کرنے والوں کے خلاف غداری کا مقدمہ چلایا جائیگا ، بھیک مانگنے اور قرضہ لینے والوں کی عزت نہیں ہوتی ،وزیر اعظم نواز شریف پاکستان کوغلامی سے نہیں نکال سکتے ،امریکی وزیر دفاع مجھے کوئی دھمکی دیکر جاتے تو طبیعت درست کردیتا ، خیبر پختونخوا کی بجلی کا نظام ہمارے حوالے کردیا جائے توصوبے میں بجلی کی قیمت20 فیصد کم کردی جائے گی ،مجھے اللہ کے سوا کسی کا خوف نہیں ۔

پیر کو خوشاب میں جلسہ عام سے خطاب کے دوران عمران خان نے کہا کہ آصف زرداری نے ملک کے ساتھ جو کیا وہ سب کے سامنے ہے،مسلم لیگ(ن) نے وفاق میں تیسری اور پنجاب میں چھٹی مرتبہ حکومت بنائی ہے، مگراس سے ملک اور صوبے کو کیا فرق پڑا، اگر فرق پڑا ہے تو صرف اتنا کہ باریاں لینے والوں نے اب اپنے بچے میدان میں اتار دیئے، لوگ کہتے ہیں بل آتے ہیں ہیں مگربجلی نہیں ملتی اگر خیبر پختونخوا کی بجلی کا نظام ہمارے حوالے کردیا جائے توصوبے میں بجلی کی قیمت20 فیصد کم کردی جائے گی۔

(جاری ہے)

انہوں نے کہا کہ جہاں کرپشن ہوتی ہے وہاں بیرونی سرمایہ کاری نہیں ہوتی صرف غربت اور افلاس ڈیرے ڈال لیتے ہیں۔ تحریک انصاف نے کرپشن پر اتحادی جماعت کے وزراء کو نکالا۔عمران خان نے کہاکہ حکمرانوں نے اپنی دولت باہر رکھی ہے اور بیرونی سرمایہ کاری پرزور دے رے ہیں، ان کی سوچ تھی کہ نوازشریف آزاد سوچ لے کر آرہے ہیں وہ ملک کو بیرونی غلامی سے نجات دلائیں گے مگر نوازشریف بھی پاکستان کوغلامی سے نہیں نکال سکتے اگر اس ملک کو کوئی عالمی اورامریکا کی کی جنگ سے نکال سکتی ہے تو وہ صرف تحریک انصاف ہی ہے، مجھے اللہ کے سوا کسی کا خوف نہیں کیونکہ میرے پیسے بیرون ملک نہیں، میں ملک کے واحد سیاستدان ہیں جو بیرون ملک سے پاکستان میں پیسے لایا۔

عمران خان نے کہا کہ کہ 11 مئی کے عام انتخابات میں تاریخی دھاندلی ہوئی ، نادرا کے چیرمین نے جب انگوٹھوں کے نشانات کی تصدیق کے لئے کام شروع کیا تو حکومت نے انہیں برطرف کردیا ان کی بیٹی کو دھمکیاں دی گئیں، اسلام آباد ہائی کورٹ نے ان کی برطرفی کو غیر قانونی قراردیدیا۔ وہ عہد کرتے ہیں کہ 11 مئی کو دھاندلی کرنے والوں کو نہیں چھوڑیں گے اور ان کے خلاف آئین کے آرٹیکل 6 کے تحت کارروائی کی کوشش کریں گے۔

عمران خا ن نے کہاکہ سوچا تھا کہ نوازشریف نئی سوچ لے کر آئیں گے مگر وہ امریکی چگ ہیگل کے سامنے ہاتھ باندھے کھڑے ہوتے ہیں،بھیک مانگنے اور قرضے لینے والوں کی عزت نہیں ہوتی۔عمران خان نے کہا کہ مجھے کسی سے کوئی خوف نہیں،حکومت سمجھتی ہے کہ عوام بھیڑ بکریاں ہیں،جتنی زیادہ غربت اور بیروزگاری ہوتی ہے اتنی زیادہ کرپشن ہوتی ۔