صورتحال کچھ بھی ہو کل صبح 10 بجے آزادی مارچ کیلئے نکلیں گے، عمران خان

بدھ 13 اگست 2014 20:11

لاہور(اُردو پوائنٹ اخبار تازہ ترین۔13اگست۔2014ء) تحریک انصاف کے چیرمین عمران خان کا کہنا ہے کہ صورتحال کچھ بھی ہو کل صبح 10 بجے آزادی مارچ کے لئے زمان پارک سے نکلیں گے جبکہ انہوں نے عوام سے اپیل کی کہ وہ اپنے بچوں کے مستقبل کو بہتر بنانے کے لئے مارچ میں شرکت کرے۔نجی ٹی وی کے مطابق عمران خان نے اپنے پیغام میں کارکنوں کو کہا کہ چوراور لٹیرے حکمرانوں کے خلاف مثالی جدوجہد کا وقت آن پہنچا ہے، نوجوان نیا پاکستان بنانے کے لئے گھروں سے نکل آئیں۔

انہوں نے کہا کہ کل صورتحال کچھ بھی ہو ہم صبح 10 بجے آزادی مارچ کے لئے زمان پارک سے نکلیں گے جبکہ انہوں نے اس دوران عوام سے بھی اپیل کی کہ وہ اپنے بچوں کے مستقبل کو بہتر بنانے کے لئے مارچ میں شرکت کرے۔دوسری جانب عمران خان کی رہائش گاہ پر پارٹی کی سینئر قیادت کا اجلاس ہوا جس میں آزادی مارچ کی تیاریوں کو حتمی شکل دی گئی جبکہ اجلاس میں جاوید ہاشمی کا معاملہ بھی زیر غور آیا۔

(جاری ہے)

اجلاس میں بتایا گیا کہ مارچ کے لئے 75 ہزار موٹرسائیکلوں کی رجسٹریشن مکمل کرلی گئی ہے جبکہ پارٹی رہنماؤں کو رات تک ایک لاکھ موٹرسائیکلوں کا ہدف مکمل کرنے کی ہدایت دی گئی ہے، مارچ کے لئے گاڑیوں کے ایندھن اورخوارک کا ذخیرہ کرلیا گیا جب کہ چھتری،پارٹی پرچم والی شرٹس اور جھنڈے بھی کثیرتعداد میں موجودہیں ۔