تحریک انصاف اور حکومت کے درمیان مذاکرات میں ڈیڈ لاک برقرار

جمعہ 29 اگست 2014 18:03

اسلام آباد(اُردو پوائنٹ تازہ ترین اخبار۔9 2اگست 2014ء) تحریک انصاف کے رہنما شاہ محمود قریشی نے کہا ہے کہ حکومت سے آرمی چیف کی ثالثی سے متعلق وضاحت مانگی ہے جبکہ مذاکرات میں ڈیڈ لاک برقرار ہے۔

(جاری ہے)

اسلام آباد کنونشن سینٹر میں حکومتی مذاکراتی کمیٹی سے مذاکرات کے بعد میڈیا سے بات کرتے ہوئے شاہ محمود قریشی نے کہا کہ ہم جب بھی مذاکرات کے لیے بیٹھے اپنی تجاویز پیش کیں اور مسئلے کے حل کی کوشش کی تاکہ معاملے کو آگے بڑھایا جائے اور ڈیڈ لاک کو توڑا جاسکے لیکن حکومت کی جانب سے مسئلے کے حل کیلئے کوئی تجویز نہیں دی گئی، حکومتی ٹیم آتی ہے اور صرف مسکرا کر چلی جاتی ہے جبکہ وہ ہم سے تجاویز پوچھتے ہیں لیکن اس کا حل پیش نہیں کرتے۔

شاہ محمود قریشی کا کہنا تھا کہ آج حکومت کے سامنے پہلا نکتہ اٹھایا ہے جس میں آرمی چیف کی ثالثی سے متعلق وضاحت مانگی گئی ہے کیونکہ آج اسمبلی میں حکومت کی جانب سے آرمی چیف سے کی گئی ثالثی کی درخواست پر وزیراعظم کا موقف بالکل برعکس تھا تاہم جب تک آرمی چیف کی ثالثی کے بارے میں وضاحت سامنے نہیں آتی مذاکرات بے سود ہوں گے۔ ان کا کہنا تھا کہ حکومت سے مذاکرات میں ڈیڈ لاک برقرار ہے اور ہمیں حکومت شش وپنج کا شکار لگتی ہے۔