مذاکرات کی گاڑی آہستہ آہستہ منزل کی طرف بڑھ رہی ہے: سراج الحق

پیر 8 ستمبر 2014 18:00

اسلام آباد(اُردو پوائنٹ اخبار تازہ ترین۔8ستمبر 2014ء) جماعت اسلامی کے امیر سراج الحق نے کہا ہے کہ مذاکرات کی گاڑی آہستہ آہستہ منزل کی جانب بڑھ رہی ہے۔ جبکہ رحمان ملک نے کہا ہے کہ مذاکرات کے علاوہ اور کوئی آپشن نہیں ہے۔ میڈیا سے گفتگو میں سراج الحق کا کہنا تھا کہ ہمارا مقصد فریقین کو مذاکرات کی میز پر لانا اور ڈیڈ لاک کو ختم کرنا تھا جس میں ہم کامیاب ہو گئے ہیں۔

(جاری ہے)

پوری قوم اس وقت اسلام آباد کی جانب دیکھ رہی ہے اور یہ توقع کر رہی ہے کہ سیاسی بحران کا جلد از جلد کوئی حل نکل آئے۔ جو پیچھے ہٹے گا قوم اس کو شاباش دے گی۔ سراج الحق نے کہا کہ پنجاب اور کشمیر میں متاثرین سیلاب سے تعزیت کا اظہار کرتے ہیں۔ قوم اور حکومت سے اپیل ہے کہ سیلاب متاثرین کا ساتھ دیں۔ قوم پر پڑنے والی آزمائش سے نمٹنا سب کی ذمہ داری ہے۔ پیپلز پارٹی کے رہنماء رحمان ملک کا کہنا تھا کہ مذاکرات کے علاوہ اور کوئی آپشن نہیں ہے۔ قربانی اور برداشت وقت کی ضرورت ہے۔