پی ٹی آئی ، پیٹ کے دھرنوں کا مقصد ملک کو غیر مستحکم کرنا ہے ،اسحق ڈار ،بعض قوتیں پاکستان کو مستحکم ہوتا نہیں دیکھنا چاہتیں،جب بھی ملکی معیشت بہتری کی جانب گامزن ہوتی ہے تو لانگ مارچ اور دھرنے شروع کر دیئے جاتے ہیں

اسلام آباد(اُردو پوائنٹ اخبار تازہ ترین۔24ستمبر۔2014ء ) ) وفاقی وزیر خزانہ سینیٹر اسحق ڈار نے کہا ہے کہ پاکستان تحریک انصاف اور عوامی تحریک کے دھرنوں کا مقصد ملک کو غیر مستحکم کرنا ہے، بعض قوتیں پاکستان کو مستحکم ہوتا نہیں دیکھنا چاہتیں، یہی وجہ ہے کہ جب بھی ملکی معیشت بہتری کی جانب گامزن ہوتی ہے اور مثبت نتائج دکھانا شروع کرتی ہے تو لانگ مارچ اور دھرنے شروع کر دیئے جاتے ہیں۔

میڈیا رپورٹ کے مطابق بدھ کو نیشنل ڈیفنس یونیورسٹی کے دورے کے موقع پر اظہار خیال کرتے ہوئے انہوں نے کہا کہ دھرنوں کی وجہ سے پوری معیشت کو نقصان پہنچا ہے جبکہ ایک دھرنے کے رہنماء کی جانب سے سول نافرمانی کی تحریک، ٹیکسوں اور یوٹیلٹی بلز کی عدم ادائیگی کے اعلان اور غیر ملکی زرمبادلہ میں تاخیر سے کاروباری برادری میں غیر یقینی صورتحال پیدا ہوئی ہے۔

(جاری ہے)

دھرنوں کی وجہ سے معاشی نقصانات کے حوالے سے وزیر خزانہ نے کہا کہ ملک کو روپے کی قدر میں چار فیصد کمی کے نتییجہ میں 240 ارب روپے کے نقصان کا سامنا ہے، قیمتوں میں عدم استحکام آیا ہے جبکہ سٹاک مارکیٹس بھی متاثر ہوئی ہیں،وزیرخزانہ نے کہا کہ اقتصادی خودمختاری کے ماحول میں پائیدار اور مجموعی اقتصادی ترقی کا حصول پاکستانی معیشت کے بارے میں حکومت کے تصور کی امتیازی خصوصیات میں شامل ہے۔

حکومت نے پائیدار اقتصادی ترقی کے حصول کا تہیہ کر رکھا ہے اور وہ گزشتہ سٹرسٹھ سال میں اقتصادی ترقی کی راہ میں حائل مشکلات ختم کرکے ملک کو ترقی کی راہ پر گامزن کرے گی، وزیرخزانہ نے کہا کہ موجودہ حکومت احتساب ' شفافیت اور بدعنوانی کے خاتمے کے اصولوں پر عمل کرکے ملکی اقتصادی صورتحال کو مکمل طور پر تبدیل کر دے گی۔انہوں نے موجودہ حکومت کوورثے میں ملنے والی معیشت کی صورتحال اور اس پر قابو پانے کیلئے اٹھائے جانے والے اقدامات سے تفصیلی آگاہ کیا۔وفاقی وزیر نے کہا کہ حکومت توانائی کی پیداوار میں اضافے پر بھرپور توجہ دے رہی ہے۔