کراچی ، ایدھی ہیڈ آفس میں ڈکیتی کا مرکزی ملزم 16 سال سے ڈکیتی کی وردا تو ں میں ملو ث رہا

منگل 21 اکتوبر 2014 17:27

کراچی(اُردو پوائنٹ اخبار تازہ ترین۔21 اکتوبر۔2014ء) کراچی میں ایدھی ہیڈ آفس میں ڈکیتی کا مرکزی ملزم 16 سال سے ڈکیتی کی بڑی ورداتیں کر رہا ہے، کئی بار پکڑا گیا، جیل گیا پھر کام شروع کردیتا تھا۔ کراچی کے ایدھی سینٹر میں سو ملین روپے سے زائد مالیت کی ڈکیتی کے حوالے سے اہم انکشافات سامنے آرہے ہیں ، پولیس کے خدشات بالکل صحیح ثابت ہوئے ہیں۔ پولیس کے مطابق 6 ماہ قبل ایدھی ہیڈ آفس میں صرف تین دن تک کام کرنے والا ملزم ہی ڈاکوؤں کا ساتھی نکلا۔

ملزم ڈکیتی کے وقت میٹھادر میں ایدھی ہیڈ آفس کی پچھلی گلی میں موجود تھا اور فون پر ملزمان کی معاونت کرتارہا تھا۔ پولیس حکام کا کہنا ہے کہ علاقے کی جیو فینسنگ سے 15موبائل فون نمبرز کا سراغ ملا تھا جنہیں مزید شارٹ لسٹ کیا گیا تو پتہ چلا کہ ڈکیتی کے دوران ملزمان تین موبائل فونز پر آپس میں مسلسل رابطے میں رہے۔

(جاری ہے)

ریکارڈ کے مطابق ملزمان نے واردات اتوار کی صبح 9بجکر 35منٹ پر شروع اور 10بجکر 8منٹ پر مکمل کی۔

یوں ملزمان لگ بھگ 33منٹ میں دس کروڑ روپے مالیت کی کرنسی اور سونا تین بڑے تھیلوں میں ڈال کر فرار ہوگئے۔ جیو فینسنگ کے بعد پولیس نے نادرا اور پولیس کے کرمنل ریکارڈ آفس سے ملزمان کی شناخت کرائی۔ پولیس کے تفتیش کاروں کے مطابق وقوعہ کے تین عینی شاہدین نے حاصل کردہ تصاویر میں ملزمان کو شناخت کرلیا۔ پولیس کے مطابق واردات کا مرکزی ملزم کراچی میں گذشتہ 16سال سے وارداتیں کررہا ہے۔ گلستان جوہر کا رہائشی یہ ملزم اب تک بینک ڈکیتی سمیت بڑی نوعیت کی 9وارداتیں کرچکا ہے جو متعدد مرتبہ گرفتار ہوا، جیل گیا اور رہا ہوکر پھر بڑے ہاتھ مارتا رہا ہے۔ اس کی گرفتاری کے لئے پولیس اب پھر چھاپے مار رہی ہے۔