تحریک انصاف کا سونامی آج گوجرانوالہ سے ٹکرائے گا

اتوار 23 نومبر 2014 11:59

گوجرانوالہ(اُردو پوائنٹ اخبار تازہ ترین۔23نومبر۔2014ء) تحریک انصاف کا سونامی آج پہلوانوں کے شہر گوجرانوالہ سے ٹکرائے گا۔ جلسے کے تمام انتظامات مکمل کرلئے گئے ہیں۔ کارکنوں کا جوش و خروش بھی عروج پر ہے۔جناح اسٹیڈیم میں جلسے کے انتظامات مکمل کر لئے گئے ہیں۔ چالیس فٹ چوڑے اور سولہ فٹ بلند مرکزی اسٹیج پر عمران خان اور دیگر مرکزی قائدین بیٹھیں گے۔

میڈیا اور پارٹی عہدیداروں کیلئے دو الگ اسٹیج بنائے گئے ہیں۔ جلسہ آرگنائزنگ کمیٹی کے مطابق پنڈال میں بیس ہزار کرسیاں لگا دی گئی ہیں۔

(جاری ہے)

جلسے کے شرکاء آٹھ دروازوں سے اسٹیڈیم میں داخل ہو سکیں گے۔ جلسے کیلئے سیکورٹی کے انتہائی سخت انتظامات کئے گئے ہیں۔ داخلی اور خارجی راستوں پر چوبیس سی سی ٹی وی کیمرے نصب کئے گئے ہیں۔ مانیٹرنگ کیلئے دو کنٹرول رومز بھی بنائے گئے ہیں۔ بائیس سو پولیس اہلکارسیکورٹی کیلئے تعینات ہونگے۔ تحریک انصاف کے کارکنوں کا جوش و خروش بھی عروج پر ہے۔ گوجرانوالہ انتظامیہ نے جلسے کو پر امن رکھنے کیلئےمسلم لیگ ن یوتھ ونگ پنجاب کے جوائنٹ سیکرٹری شعیب بٹ اور سٹی صدر آصف بٹ سمیت پانچ عہدیداروں کو نظر بند کرنے کا فیصلہ کیا ہے۔