سندھ ہائی کورٹ کا سلیمان لاشاری قتل کیس کی ازسرنو تحقیقاتی کمیٹی کو کالعدم قرار دیتے ہوئے جمع شدہ چالان پرہی کارروائی آگے بڑھانے کا حکم

پیر 24 نومبر 2014 17:19

کراچی(اُردو پوائنٹ تاز ترین اخبار۔ 24نومبر 2014ء) سندھ ہائی کورٹ کے جسٹس محمد علی مظہر کی سربراہی میں دو رکنی بینچ نے سلیمان لاشاری قتل کیس کی ازسرنو تحقیقاتی کمیٹی کو کالعدم قرار دیتے ہوئے جمع شدہ چالان پرہی کارروائی آگے بڑھانے کا حکم دے دیا۔ پیر کو بینچ نے سلیمان لاشاری قتل کیس کی از سر نو تحقیقات کے لئے تشکیل دی گئی کمیٹی کے خلاف درخواست کی سماعت کی، سماعت میں فریقین کے دلائل سننے کے بعد عدالت عالیہ نے تحقیقاتی کمیٹی کو کالعدم قرار دے دیا۔

(جاری ہے)

عدالت نے حکم دیا کہ کیس کی از سر نو تفتیش کی ضرورت نہیں اور انسداد دہشتگردی کی عدالت میں جمع شدہ چالان پرہی کارروائی آگے بڑھائی جائے۔واضح رہے کہ رواں برس 8 اور 9 مئی کی درمیانی شب ڈیفنس میں واقع بنگلے کے اندر سندھ پولیس کے اعلی افسر کے بیٹے سلمان ابڑو اور اس کے ساتھ پولیس اہلکار کی مبینہ فائرنگ سے سلیمان لاشاری جاں بحق ہوگیا تھا جبکہ فائرنگ کے تبادلے میں سلمان ابڑو زخمی اور اس کے ساتھ موجود پولیس اہلکار ظہیر ہلاک ہوگیا تھا۔