تحریک انصاف نے کراچی بند کرانا شروع کر دیا، معمولات زندگی متاثر، پولیس کا لاٹھی چارج

جمعہ 12 دسمبر 2014 10:54

کراچی(اُردو پوائنٹ اخبار تازہ ترین۔11دسمبر 2014ء) پاکستان تحریک انصاف نے کراچی بند کرانا شروع کر دیا ، شاہراہ فیصل پر مختلف مقامات پر احتجاج کیا جا رہا ہے ، سٹار گیٹ پر ٹائر جلا کر سڑک بلاک کر دی ، نرسری کے مقام پرپولیس نے لاٹھی چارج کیا۔ پولیس نے نرسری اور راشد منہاس روڈ ٹریفک کے لیے کھلوا دی ، شہریوں کے معمولات زندگی بری طرح متاثر ہیں ، پولیس کی اضافی نفری تعینات ہے ، متبادل ٹریفک پلان بھی بنا دیا گیا ۔

تحریک انصاف اپنے پلان کے مطابق آج کراچی میں مختلف مقامات پر احتجاج کر رہی ہے ۔ پی ٹی آئی کے کارکنوں نے 3 تلوار کے مقام پر رات سے ہی دھرنا دے رکھا ہے ۔ قائد آباد کے مقام پر پی ٹی آئی کے کارکنوں کے سڑک روکنے پر پولیس نے لاٹھی چارج کر کے کارکنوں کو منتشر کر دیا ۔

(جاری ہے)

کارکنوں نے علی الصبح شاہراہ فیصل پر نرسری کے علاقے میں احتجاج کیا اور روڈ بلاک کر دی ۔

ریپڈ ریسپانس فورس نے لاٹھی چارج کر کے سڑک ٹریفک کے لیے کھلوا دی ۔ تحریک انصاف کے کارکنوں نے شاہراہ فیصل پر اسٹار گیٹ کے علاقے میں ٹائر جلا کر سڑک بلاک کر دی ، راشد منہاس روڈ پر بھی ٹائر جلا کر ٹریفک روک دی گئی ، پولیس اہلکاروں نے آگ بجھا کر ٹریفک بحال کرا دی ۔ نمائش چورنگی پر بھی تحریک انصاف کے کارکنوں نے احتجاج کرتے ہوئے سڑک کو ٹریفک کے لیے بند کر دیا ۔

تحریک انصاف کی جانب سے صبح سے ہی مختلف مقامات پر احتجاج کر رہی ہے ۔ عمران خان جمعے کی دوپہر کراچی پہنچیں گے جس کے بعد وہ دھرنوں کے شرکاء سے خطاب کریں گے ۔ تحریک انصاف کے احتجاج کے پیش نظر سیکورٹی اور ٹریفک پلان ترتیب دے دیا گیا ہے ۔ پولیس کے سولہ ہزار اہلکار سیکورٹی فرائض انجام دیں گے جبکہ ٹریفک کی بحالی کے لیے پانچ سو اہلکاروں کی نفری تعینات ہے۔