آصف علی زرداری کی جانب سے بلاول بھٹو زرداری کو منانے کی ایک اور کوشش ناکام ،سابق صدر نے مخدوم امین فہیم کو خصوصی ٹاسک سونپا تھا،سینئر رہنما نے تحفظات دور کرنے کی بھرپور کوششیں کی، مثبت نتیجہ سامنے نہیں آسکا

ہفتہ 10 جنوری 2015 20:36

آصف علی زرداری کی جانب سے بلاول بھٹو زرداری کو منانے کی ایک اور کوشش ..

کراچی(اُردو پوائنٹ اخبار تازہ ترین۔10جنوری2015ء) پاکستان پیپلز پارٹی کے چیرمین بلاول بھٹو زرداری ان دنوں آصف علی زرداری کے انداز سیاست اور سندھ حکومت کی کارکردگی کے باعث ناراض ہوکر لندن میں موجود ہیں، جنہیں منانے کے لئے اب تک کی جانے والی تمام کوششیں رائیگاں جاچکی ہیں۔

(جاری ہے)

تفصیلات کے مطابق پاکستان پیپلز پارٹی کے چیرمین بلاول بھٹو زرداری کو منانے کے لئے ان کے والد نے مخدوم امین فہیم کو خصوصی ٹاسک سونپا تھا ، اس سلسلے میں انہوں نے بلاول بھٹو زرداری سے ملاقات بھی کی تھی جس میں پیپلزپارٹی کے سینئر رہنما نے ان کے تحفظات دور کرنے کی بھرپور کوششیں کی تھیں لیکن دونوں کی ملاقات کا کوئی مثبت نتیجہ سامنے نہیں آسکا۔

واضح رہے کہ بلاول بھٹو زرداری خاندانی معاملات، اپنے والد کی سیاسی حکمت عملی اور سندھ حکومت کی مجموعی کارکردگی پر شدید ناراض ہیں جس کی وجہ سے انہوں نے گزشتہ ماہ اپنی والدہ کی برسی کی تقریب میں بھی شرکت نہیں کی تاہم پیپلز پارٹی ان باتوں کو بے بنیاد قرار دیتی ہے۔