ترقیاتی سکیموں کی جامع پلاننگ کے لئے فنی وانتظامی امور کا خیال رکھا جائے ،ڈویژنل کمشنر

بدھ 28 جنوری 2015 23:30

فیصل آباد(اُردو پوائنٹ تازہ ترین اخبار۔ 28 جنوری 2015ء)ڈویژنل کمشنر کیپٹن(ر)نسیم نواز نے ہدایت کی ہے کہ عوامی فلاح وبہبود کی ترقیاتی سکیموں کی جامع پلاننگ کے لئے محکمانہ گائید لائنزودیگرفنی وانتظامی امور کا خیال رکھا جائے تاکہ تعمیراتی مراحل میں کوئی دشواری پیدا نہ ہو۔انہوں نے یہ ہدایت ڈویژنل ڈویلپمنٹ ورکنگ پارٹی(ڈی ڈی ڈبلیو پی)کے اجلاس کی صدارت کرتے ہوئے جاری کی جس میں 19کروڑ سے زائد روپے کی لاگت سے حلقہ پی پی 67کے علاقوں قائداعظم پارک،ملک پور،کچی آبادی،خالد بن ولید کالونی،سفیان ٹاؤن،اظہر ٹاؤن،مانانوالہ،مغل پورہ،عباس پارک،رحمان شریف میں سیورلائنز جبکہ حلقہ این اے 76کے چکوک 100گ ب ،101گ ب،119گ ب،53گ ب،54گ ب اور21گ ب میں رورل واٹر سپلائی سکیمز کے تعمیراتی کام کی منظوری دی گئی۔

(جاری ہے)

علاوہ ازیں کھرڑیانوالہ چوک شیخوپورہ روڈ کی تعمیر وبحالی کا منصوبہ منظوری کے لئے پی اینڈڈی کو بھجوانے کا فیصلہ کیا گیا۔ڈویژنل کمشنر نے متعلقہ محکموں کے افسران کو ہدایت کی کہ وہ ان ترقیاتی منصوبوں پر فوری عملدرآمد کے لئے محکمانہ قواعد وضوابط کے تمام تقاضے پورے کریں۔انہوں نے کہا کہ کوئی منصوبہ تعطل کا شکار نہیں ہونا چاہیے ،کسی قسم کے انتظامی وفنی مسئلے کے بارے میں فوری نشاندہی کی جائے تاکہ اس کے تدارک میں تاخیر نہ ہو۔اجلاس میں ڈائریکٹر ڈویلپمنٹ رائے ظفر عباس بھٹی،ای ڈی اوفنانس مہر رمضان،ڈی او روڈز عبدالخالق،ایکسئین پبلک ہیلتھ انجینئرنگ اور واسا کے افسران نے شرکت کی۔