پاکستان میں شدت پسندی کے فروغ کیلئے فنڈز دینے کاالزام ، سعودی عرب نے تردید کردی

پیر 16 فروری 2015 12:46

اسلام آباد(اُردو پوائنٹ اخبار تازہ ترین۔16فروری 2015ء) سعودی عرب نے پاکستان میں دینی مدارس کو دیے جانیوالے عطیات کے نام پر شدت پسندی کے فروغ کیلئے فنڈز دینے کی تردید کردی اور کہاکہ کچھ عناصر اس حوالے سے غلط پروپیگنڈا کر رہے ہیں۔

(جاری ہے)

عرب میڈیا کے مطابق اسلام آباد میں سعودی سفارتخانے کی جانب سے جاری ایک بیان میں کہا گیا ہے کہ کسی مدرسے، مسجد یا فلاحی ادارے کی جانب سے سعوی عرب سے مالی مدد کی درخواست کی جاتی ہے تو اس معاملے کو وزرات خارجہ کے توسط سے پاکستانی حکومت کو بھجوایا جاتا ہے تاکہ درخواست کرنے والے کی درستگی اور اہلیت کی جانچ پڑتال کی جا سکے ، کسی بھی قسم کی فنڈنگ صرف اسی صورت میں ہوتی ہے جب پاکستانی وزرت خارجہ کی جانب سے تحریری طور پر سعودی سفارت خانے کو مطلع کر دیا جاتا ہے۔

بیان کے مطابق سعودی عرب دہشت گردی کے خاتمے کے لیے پاکستان کی حکومت کے ساتھ مکمل تعاون کر رہا ہے اور اس حوالے سے بہت حساس ہے کہ انسان دوستی کی بنیاد پر مالی امداد شدت پسند عناصر کے ہاتھوں میں نہ چلی جائے۔