لاہور، راولپنڈی ، اسلام آباد میں بارش سے موسم خوشگوار، جل تھل ایک ہوگیا

پیر 30 مارچ 2015 11:02

لاہور/ راولپنڈی/ اسلام آباد(اُردو پوائنٹ اخبار تازہ ترین۔30مارچ2015ء) لاہور کے مختلف علاقوں میں بارش نے موسم میں خوشگوار خنکی پیدا کر دی ، راولپنڈی ، اسلام آباد سمیت پنجاب کے بیشتر شہروں میں موسلادھار بارش سے جل تھل ایک ہوگیا۔ لاہور کے مختلف علاقوں میں آسمان پر گہرے بادل چھائے ہیں اور تیز ہوا کے ساتھ ہونے والی بوندا باندی نے موسم میں خوشگوار خنکی پیدا کر دی ہے۔

صوبائی دارالحکومت میں رات گئے بھی چھماچھم مینہ برسا ۔ راولپنڈی اور اسلام آباد میں آسمان پر بادلوں اور سورج کی آنکھ مچولی جاری ہے ۔ رات کو بھی جڑواں شہروں میں گرج چمک اور تیز ہوا کے ساتھ ابر کرم جَم کے برسا ، موسلا دھار بارش سے جل تھل ایک ہوگیا ۔ پشاور میں بارش کے آسمان پر سورج چمکنے لگا تاہم پارہ گرنے اور ہوا چلنے سے خنکی بڑھ گئی ہے ۔

(جاری ہے)

ملتان میں سورج نے آنکھیں دکھانا شروع کر دیں ۔ کراچی سمیت سندھ میں آسمان صاف ہے ادھر آزاد کشمیر میں گزشتہ روز ہونے والی برفباری سےحاجی پیر، نیزاگلی ، تولی پیر روڈ ٹریفک کے لیے بند ہیں ۔ گزشتہ روز ہونے والے برفباری سے متعدد شاہراہیں بند ہیں ۔ محکمہ موسمیات کے مطابق آئندہ چوبیس گھنٹے کے دوران ملک کے بیشتر علاقوں میں موسم خشک رہے گا تاہم کشمیر، راولپنڈی اور سرگودھا ڈویژن میں بارش ہو سکتی ہے۔