قومی اسمبلی کی قائمہ کمیٹی برائے سمندر پار پاکستانیز وترقی انسانی وسائل کا 13واں اجلاس

یمن سے واپس آنے والے سمندر پارپاکستانیوں کی بروقت وطن واپسی کے لئے اٹھائے گئے حکومتی اقدامات کو سراہا مستقبل میں خلیجی ممالک میں پاکستانیوں کو کسی بھی مشکل صورتحال کے پیش نظر حکمت عملی تیار کی جائے، کمیٹی کی ہدایت

جمعہ 15 مئی 2015 21:22

قومی اسمبلی کی قائمہ کمیٹی برائے سمندر پار پاکستانیز وترقی انسانی ..

اسلام آباد(اُردو پوائنٹ اخبار تازہ ترین۔ 15 مئی۔2015ء) قومی اسمبلی کی قائمہ کمیٹی برائے سمندر پار پاکستانیز وترقی انسانی وسائل نے یمن سے واپس آنے والے سمندر پارپاکستانیوں کی بروقت وطن واپسی کے لئے اٹھائے گئے حکومتی اقدامات کو سراہتے ہوئے اوپی ایف کو ہدایت کی ہے کہ مستقبل میں خلیجی ممالک میں پاکستانیوں کو کسی بھی مشکل صورتحال کے پیش نظر حکمت عملی تیار کی جائے۔

قومی اسمبلی کی قائمہ کمیٹی برائے سمندر پار پاکستانیز وترقی انسانی وسائل کا 13واں اجلاس اوپی ایف ہید آفس میں منعقد ہوا۔ اجلاس کی صدارت میر عامر علی خان مگسی نے کی جبکہ وفاقی وزیر وزارت سمندر پارپاکستانیز وترقی انسانی وسائل پیر سید صدرالدین شاہ راشدی، کمیٹی کے ممبران بشمول رانا محمد افضل خان، چوہدری عابد رضا،سید ساجد مہدی،میاں نجیب الدین اویسی ،میاں امتیاز احمد،صبیحہ نذیر،شکیلہ خالد لقمان،مسرت رفیق مہسر،شیخ صلاح الدین،عالیہ کامران،عائشہ،وفاقی سیکرٹری سکندر اسماعیل خان، منیجنگ ڈائریکٹر اوپی ایف ،حبیب الرحمن خان اور دیگر اعلیٰ حکام نے شرکت کی۔

(جاری ہے)

جلاس کے دوران یمن سے واپس آنے والے پاکستانیوں کی بروقت واپسی کے سلسلے میں اوپی ایف کی کارکردگی کا جائزہ لیا گیا ۔اجلاس کے شرکاء نے اوپی ایف کی جانب سے یمن سے واپس آنے والے سمندر پارپاکستانیوں کو فراہم کردہ سہولیات پر مکمل اطمینان کا اظہار کیا اور اوپی ایف کی کارکردگی کو سراہا۔ شرکاء نے متعلقہ حکام کو ہدایت کی کہ مستقبل میں خلیجی ممالک میں کسی بھی نا گہانی صورتحال سے نبردآزما ہونے کے لئے حکمت عملی تیار کی جائے۔

وفاقی سیکرٹری سکندر اسماعیل خان اور ایم ڈی اوپی ایف، حبیب الرحمن خان نے یمن سے واپس آنے والے سمندر پار پاکستانیوں کی بروقت واپسی میں اوپی ایف کے کردارسے متعلق بریفنگ دی ۔اجلاس کو بتایاگیا کہ خصوصی پروازوں اور پاکستان نیوی کے جہاز کے ذریعے 1037سمندر پارپاکستانی یمن سے واپس آئے جبکہ اوپی ایف کی جانب سے 605سمندر پار پاکستانیوں کو اسلام آباد اور کراچی کے ہوائی اڈوں اور بندرگاہ پر سہولیات فراہم کی گئیں۔

اجلاس کو بتایا گیا کہ یمن سے واپس آنے والے سمندر پار پاکستانیوں کو اوپی ایف کی جانب سے مفت ٹرانسپورٹ اور کرایہ فراہم کیا گیا اور انہیں ان کے آبائی علاقوں تک پہنچانے کیلئے ہر ممکن سہولیات فراہم کی گئیں ۔اجلاس کو مزید بتایا گیا کہ وفاقی وزیر پیر سید صدرالدین شاہ راشدی کی ہدایات کی روشنی میں ایم ڈی اوپی ایف خصوصی طور پر کراچی گئے اور پہلی پرواز کے ذریعے واپس آنے والے سمندر پارپاکستانیوں کا استقبال کیا جبکہ وفاقی سیکرٹری سکندر اسماعیل خان اور ایم ڈی اوپی ایف نے بحری جہاز کے ذریعے واپس آنے والے سمندر پارپاکستانیوں کاکراچی بندرگاہ پر خیر مقدم کیا ۔

اجلاس کو بتایا گیا کہ کہ تمام ائیر پورٹس پر قائم اوپی ایف سہولیاتی مراکز کی استعداد کار میں اضافہ کیاگیا اور وہاں اضافی افسران اور عملہ تعینات کیاگیا تاکہ یمن سے واپس آنے والے پاکستانیوں کو خصوسی سہولیات فراہم کی جائیں ۔اجلاس کو مزید بتایا گیا کہ یمن سے واپس آنے والے سمندر پارپاکستانیوں نے بروقت انخلاء پر حکومت پاکستان اور اوپی ایف کا شکریہ اداکیا گیا۔

متعلقہ عنوان :