سری لنکا کا پاکستان کے خلاف تین ٹیسٹ میچوں کی ہوم سیریز کیلئے 16 رکنی اسکواڈ کا اعلان

کولمبو(اُردو پوائنٹ اخبار تازہ ترین۔ 11 جون۔2015ء) سری لنکا نے پاکستان کے خلاف تین ٹیسٹ میچوں کی ہوم سیریز کیلئے 16 رکنی اسکواڈ کا اعلان کردیا ہے۔ میڈیا رپورٹ کے مطابق اسکواڈ میں سب سے حیران کن شمولیت بلے باز جیہان مبارک کی ہے جن کی آٹھ سال کے طویل عرصے کے بعد ٹیم میں واپسی ہوئی ہے، مبارک نے آخری ٹیسٹ میچ 2007 میں کھیلا تھا۔اس کے علاوہ اسکواڈ میں تین نئے کھلاڑیوں کو شامل کیا گیا ہے جن میں آف اسپنر تھندو کشال، فاسٹ باوٴلر دشمانتھا چمیرا اور متعدد ایک روزہ میچ کھیلنے والے کشال پریرا کو شامل کیا گیا ۔

سری لنکا نے زخمی سورنگا لکمل کو بھی اسکواڈ کا حصہ بنایا ہے تاہم ٹیسٹ میچز میں ان کی شمولیت کا انحصار فٹنس ٹیسٹ پاس کرنے پر ہو گا۔ جن کھلاڑیوں کو ٹیم میں شامل کیا گیا ہے ان میں اینجلو میتھیوز(کپتان)، لہیرو تھری مانے، کمار سنگاکارا، دمتھ کرونارتنے، دنیش چندیمل، کتھرووان وتھانگے، جیہان مبارک، کشال پریرا، رنگنا ہیراتھ، دلروان پریرا، تھرندو کشال، نوان پرادیپ، دھمیکا پرساد، دشمانتھا چمیرا، سورنگا لکمل شامل ہیں سری لنکا کی ٹیم پاکستان کے خلاف تین ٹیسٹ میچوں پر مشتمل سیریز کھیلے گی جس کا آغاز 17 جون سے گال میں ہو گا جس کے بعد دوسرا اور تیسرا ٹیسٹ میچ بالترتیب کولمبو اور پالے کیلی میں ہو گا۔

(جاری ہے)

ادھر پاکستانی ٹیم کے کوچ وقار یونس نے پراعتماد ہیں کہ قومی ٹیم دورہ سری لنکا کے دوران ٹیسٹ اور ایک روزہ سیریز میں مقررہ اہداف حاصل کر لے گی۔پاکستانی ٹیم اپنے 53 روزہ دورہ سری لنکا میں تین ٹیسٹ میچوں کے بعد پانچ ایک روزہ اور دو ٹی ٹوئنٹی میچوں پر مشتمل سیریز بھی کھیلے گی جہاں وہ ایک روزہ سیریز میں فتح حاصل کر کے 2017 کی چیمپیئنز ٹرافی کیلئے کوالیفائی کرنے کیلئے پرعزم ہے۔