سپین اور پرتگال میں شدید گرمی، شہریوں کو احتیاط کی ہدایت

میڈرڈ (اُردو پوائنٹ اخبار تازہ ترین۔ 30 جون۔2015ء) یورپی ملک سپین اور پرتگال گرمی کی شدید لہر کی لپیٹ میں ہیں اور حکام نے شہریوں کی صحت کے حوالے سے وراننگ جاری کی ہے۔ان ممالک کے بعض علاقوں میں درجہ حرارت 40 سینٹی گریڈ تک پہنچ گیا ‘ سپین کے چالیس سے زائد صوبوں میں گرم موسم کی وارننگ جاری کی گئی ہے۔سپین کے جنوبی شہر قرطبہ میں ریڈ الرٹ جاری کیا گیا ہمسایہ ملک پرتگال نے چار خطوں کے لیے اورنج الرٹ جاری کیا ۔

(جاری ہے)

سپین کے محکمہ موسمیات کے ایک ترجمان نے فرانسیسی میڈیا سے بات چیت کرتے ہوئے کہا ہے کہ موجودہ موسمی حالات غیر معمولی ہیں۔انھوں نے خبردار کیا کہ غیر معمولی درجہ حرارت کے نتیجے میں شہریوں کی صحت کو بہت زیادہ خطرہ لاحق ہو سکتا ہے۔سپین کے شہر قرطبہ، اشبیلیہ اور طلیطلہ پیر کو گرمی کی وجہ سے سب سے زیادہ متاثر ہوئے ‘ بعض علاقوں میں درجہ حرارت 44 سینٹی گریڈ تک پہنچنے کا توقع ہے اشبیلیہ میں لوگوں نے گرمی سے بچنے کیلئے دریا کا رخ کیا اور وہاں نہاتے رہے ‘ حکام نے لوگوں سے اپیل کی کہ انھیں دن میں کم از کم تین لیٹر پانی پینا چاہیے اور گرم خوراک کھانے سے پرہیز کریں۔