الطاف حسین کیخلاف غداری کا مقدمہ درج کرنے کی درخواست پر لارجر بینچ تشکیل دینے کی سفارش ، فائل چیف جسٹس کو بھجوا دی گئی

جمعہ 24 جولائی 2015 12:55

الطاف حسین کیخلاف غداری کا مقدمہ درج کرنے کی درخواست پر لارجر بینچ ..

لاہور ( اُردو پوائنٹ اخبار تازہ ترین۔ 24 جولائی۔2015ء) لاہور ہائی کورٹ میں متحدہ قومی موومنٹ کے قائد الطاف حسین کے خلاف غداری کا مقدمہ درج کرنے کے کیس کی سماعت ، جسٹس مظاہر علی اکبر نقوی نے لارجر بینچ تشکیل دینے کی سفارش کر دی۔

(جاری ہے)

گزشتہ روز لاہور ہائیکورٹ کے جسٹس مظاہر علی اکبر نقوی نے کیس کی سماعت شروع کی تو عدالت کے روبرو درخواست گزار کے وکیل آفتاب ورک نے موقف اختیار کیا کہ ایم کیو ایم کے قائد الطاف حسین نے پاک فوج اور ملک مخالف تقاریر کیں لیکن وزارت داخلہ و خارجہ سمیت وزارت اطلاعات نے کوئی ایکشن نہیں لیا حالانکہ یہ اقدام غداری کے زمرہ میں آتا ہے۔

لہٰذا عدالت سے استدعا ہے کہ الطاف حسین کیخلاف غداری کا مقدمہ درج کرنے کا حکم دیا جائے ۔ جسٹس مظاہر علی اکبر نقوی نے قرار دیا کہ معاملہ حساس نوعیت کا ہے اس کی سماعت لارجربینچ کرے گا ۔فاضل جج نے لارجر بینچ کی تشکیل کے لیے فائل چیف جسٹس لاہور ہائیکورٹ جسٹس منظور ملک کو بھجوا دی جبکہ وزارت داخلہ ،خارجہ اور وزیر اعظم کے پرنسپل سیکرٹری کو نوٹسز جاری کر دئیے۔