ہمارا مشن عوام کی بلاتفریق خدمت کو یقینی بنانا ہے ،چودھری واجد ایوب

اسلام آباد(اُردو پوائنٹ اخبار تازہ ترین۔ 25 اگست۔2015ء)ترنول سے پاکستان مسلم لیگ(ن) کے امیدوار برائے چیئرمین یوسی 74 چودھری واجد ایوب نے کہاہے کہ قومی الیکشن کی طرح پاکستان مسلم لیگ(ن) کے ٹکٹ ہولڈر بلدیاتی انتخابات میں بھی کامیاب ہوں گے،بلدیاتی انتخابات میں پاکستان مسلم لیگ(ن) تاریخ ساز فتح حاصل کرکے ایک بارپھر ثابت کرے گی کہ عوام کی واحدنمائندہ جماعت پاکستان مسلم لیگ(ن) ہی ہے-ان خیالات کااظہار انہوں نے ایک میٹنگ کے دوران خطاب کرتے ہوئے کیا-چودھری واجد ایوب نے کہاکہ میں نے اپنے علاقے کی عوام کی فلاح و بہبودکیلئے میدان میں آنے کا فیصلہ کیا ہے اور اپنے علاقے کو منتخب ہونے کے بعد ترجیحی بنیادوں پر حل کرونگا-مسلم لیگی رہنمانے کہاکہ ہمارامشن عوام کی بلاتفریق خدمت کو یقینی بنانا ہے،منافقت کی سیاست کو ہمیشہ کیلئے دفن کر دوں گا،لوگوں کے مسائل ان کی دہلیز پر حل کرنے کی کوشش کرونگا،بلدیاتی انتخابات میں عوام11مئی کی طرح پاکستان مسلم لیگ(ن) کے نمائندوں کا انتخاب کریں گے-انہوں نے کہاکہ عمران خان کا مقصد صرف اور صرف اقتدار کا حصول ہے جس کیلئے وہ ملکی او رعوامی مفادات کو بھی داؤپر لگا رہے ہیں،عمران خان کی خواہش پر جوڈیشل کمیشن کا قیام عمل میں لایاگیا مگر وہ دھاندلی کے ثبوت نہیں دے سکے-چودھری واجد ایوب نے کہاکہ پاکستان مسلم لیگ(ن) عوامی طاقت کے بل بوتے پر اقتدار میں آئی ہے،2013ء کے الیکشن پاکستان مسلم لیگ(ن) نے نہیں کروائے اور نہ ہی نگران حکومت میں اس کا کوئی کردار تھا،اقتدار کی ہوس رکھنے والوں کی حکومت مخالف تمام سازشیں ناکام رہیں گی- چودھری واجد ایوب نے کہاکہ پاکستان مسلم لیگ(ن) عوام کے حقوق کیلئے جدوجہد جاری رکھے گی،حکومت دہشت گردی ،نوانائی سمیت تمام بحرانوں کے خاتمے کیلئے سنجیدہ اور مخلصانہ اقداما ت کررہی ہے جس کے نتیجے میں ملک میں دہشتگردوں اور ان کے سہولت کاروں کو سرچھپانے کی جگہ نہیں ملے گی-