انگلینڈ کیخلاف 3ٹی 20میچوں کی سیریز : قومی ٹیم کااعلان کردیا گیا

لاہور(اُردو پوائنٹ اخبارتازہ ترین - آن لائن۔12 نومبر۔2015ء)پاکستان کرکٹ بورڈنے انگلینڈ کے خلاف پاکستان کے ٹی20اسکواڈ کااعلان کردیا۔ٹیم میں سرفراز احمد کی واپسی ہوئی ہے جبکہ عمر اکمل کوڈراپ کردیا گیا ہے، چیئرمین شہریا خان نے منظوری دے دی ، ٹی 20سیریز کا پہلا میچ 26نومبر کو کھیلا جائے گا ۔ تفصیلات کے مطابق انگلینڈ کیخلاف 3 ٹی 20میچوں کی سیریز کیلئے قومی ٹیم کا سکواڈ کا اعلان کردیا گیا ہے جس کی باقاعدہ منظوری شہریار خان نے دے دی ہے ، سکواڈ کا اعلان چیف سلیکٹر ہارون الرشید نے کیا ۔

ٹی20اسکواڈکے دیگر کھلاڑیوں میں شاہد آفریدی کپتان،احمد شہزاد،محمد حفیظ،شعیب ملک ،عامر یامین،صہیب مقصود،انور علی،عماد وسیم ،محمد رضوان، رفعت اللہ مہمند، وہاب ریاض ،محمد عرفان ،عمران خان جونیئر،سہیل تنویراورافتخار احمد شامل ہیں۔

(جاری ہے)

عمر اکمل کو ڈسپلن کی خلاف ورزی پر شوکاز نوٹس دینے کا فیصلہ کرتے ہوئے ٹیم سے ڈراپ کردیا گیا ہے ۔ ترجمان پی سی بی کا کہنا ہے کہ عمر اکمل نے ڈسپلن کی خلاف ورزی کی ہے انہوں نے کرکٹ کا وقار مجروع کیا ہے اور کرکٹ بورڈ کی ساکھ کو نقصان پہنچایا ہے تین میچوں پر مشتمل ٹی 20 سیریز کا پہلا میچ جمعرات 26نومبر کو دبئی انٹرنیشنل کرکٹ اسٹیڈیم میں کھیلا جائے گا، میچ پاکستانی وقت کے مطابق رات 9بجے شروع ہوگا۔

قومی کرکٹ ٹیم کے چیف سلیکٹر ہارون الرشید نے کہا ہے کہ ہر سیریز میں ایک دو نئے لڑکوں کو ضرور چانس دیا جاتا ہے تاکہ ورلڈ ٹی 20 کیلئے بہترین سکواڈ تشکیل دیا جاسکے اس بار بھی رفعت اللہ مہمند کو ٹیم میں شامل کیا گیا ہے امید ہے وہ بہترین پرفارمنس دینگے ۔ عمر اکمل کے حوالے سے ہارون الرشید نے کہا ان کے حوالے سے ہم تک اطلاعات آئی ہیں کچھ نہ کچھ تو ضرور ہوا ہے جس کی وجہ سے عمر اکمل کو شوکاز نوٹس جاری کیا گیا ہے اس حوالے سے انکوائری چل رہی ہے مکمل انکوائری کے بعد تمام معاملہ سامنے آجائے گا اس سے پہلے کسی قسم کی کوئی بات نہیں کی جاسکتی ۔ ٹی 20سکواڈ کی قیادت شاہد آفریدی کرینگے بہترین سکواڈ تشکیل دیا گیا ہے ہماری نظریں ورلڈ ٹی 20ورلڈ کپ پر مرکوز ہیں