چیئرمین پی سی بی شہریار خان نے خراب کھیل نظرانداز کرتے ہوئے ٹیم کی شان میں قصیدے پڑھنا شروع کر دیے

منگل 24 نومبر 2015 13:44

چیئرمین پی سی بی شہریار خان نے خراب کھیل نظرانداز کرتے ہوئے ٹیم کی شان ..

لاہور(اُردو پوائنٹ اخبارتازہ ترین - آن لائن۔24 نومبر۔2015ء) چیئرمین پی سی بی شہریار خان نے خراب کھیل نظرانداز کرتے ہوئے ٹیم کی شان میں قصیدے پڑھنا شروع کر دیے،ان کا کہنا ہے کہ ہار جیت تو ہوتی رہتی ہے مگر کھلاڑیوں نے ڈٹ کر مقابلہ کیا، زندگی میں پاکستانی کرکٹرز کی اتنی اچھی فیلڈنگ نہیں دیکھی۔تفصیلات کے مطابق قومی کرکٹ ٹیم بیٹنگ آرڈر میں اکھاڑ پچھاڑ، بیٹسمینوں کے غیر ذمہ دارانہ کھیل، بولرز کی غیر مستقل مزاجی اور فیلڈرز کی غفلت کے سبب انگلینڈ سے ون ڈے سیریز 1-3سے ہار گئی،کھلاڑیوں نے متعدد کیچز چھوڑے، دوسرے ون ڈے میں رن آؤٹ کے 3مواقع گنوانے والے گرین شرٹس نے تیسرے میں خود اس انداز میں وکٹیں گنوائیں،ان سب حقائق کو نظر انداز کرتے ہوئے چیئرمین پی سی بی شہریار خان نے پلیئرز اور مینجمنٹ کا حوصلہ بڑھا دیا۔

(جاری ہے)

قذافی اسٹیڈیم لاہور میں میڈیا سے بات چیت کرتے ہوئے انھوں نے کہا کہ میں جب یواے ای میچز دیکھنے کیلیے گیا تو وہاں مینجمنٹ سے ملاقات ہوئی، میں نے ان سے کہاکہ ہار جیت تو ہوتی رہتی ہے،خوشی کی بات یہ ہے کہ ٹیم نے جان لڑائی اور ڈٹ کرمقابلہ کیا، سیریز کے آخری میچ میں 350سے زائد رنز کا بہت بڑا ہدف تھا لیکن کھلاڑیوں میں اسے بھی حاصل کرنے کیلیے بڑا جوش اور جذبہ دکھائی دیا، یہ بڑی مثبت بات ہے۔

اس مقابلے میں ٹیم کی فیلڈنگ بھی بہترین تھی، میں نے زندگی میں پاکستانی پلیئرز میں اس نوعیت کی مستعدی نہیں دیکھی، انھوں نے مزید کہا کہ پلیئرز کو تیار کرنے کیلیے محنت کرنے والے کوچ وقار یونس اور ان کے معاونین کو میں نے مبارکباد پیش کی ہے، امید ہے کہ آنے والے وقت میں مزید بہتری آئے گی۔