آئی سی سی میں اصلاحات ٗ جنوبی افریقہ اور زمبابوے نے بھی ششناک منوہر کی تجویز کی حمایت کر دی

اتوار 29 نومبر 2015 13:13

جوہانسبرگ (اُردو پوائنٹ اخبارتازہ ترین - این این آئی۔29 نومبر۔2015ء) آئی پی ایل کے سربراہ ششانک منوہر کی طرف سے آئی سی سی کے موجودہ نظام کی مخالفت کے بعد جنوبی افریقہ اور زمبابوے نے بھی ان کی حمایت کرتے ہوئے آئی سی سی کے نظام میں بڑے پیمانے پر تبدیلیوں کا مطالبہ کر دیا ۔جنوبی افریقہ کرکٹ کے چیف ایگزیکٹو ہارون لورگاٹ نے کہاکہ وہ آئی سی سی کو بہتر بنانے کیلئے منوہر کی تجویز کی حمایت کرتے ہیں اس مقصد کیلئے آئی سی سی کے آئین میں ترمیم ہونی چاہیے انہوں نے کہاکہ مجھے یقین ہے کہ تمام سات ارکان منوہر کی تجویز کی حمایت کرینگے اس مقصد کیلئے آئی سی سی کے آئین میں ترمیم کی جائیں گی ۔

لورگاٹ نے بھارتی میڈیا کو بتایا کہ وہ اس مقصد کیلئے کام کریں گے ۔لورگاٹ نے کہاکہ میرا ہمیشہ یہ نظر یہ رہا ہے کہ ملکر چلنا چاہیے اور اس مقصد کیلئے ہمیں دنیا بھر کی حمایت کی ضرورت ہے ۔

(جاری ہے)

زمبابوے کرکٹ کے چیئر مین تنونگا موکلانی نے کہاکہ آئی سی سی کے محصولات کو مساوی طورپر تقسیم ہونا چاہیے ہم پر کسی کی کوئی نظر کرم نہیں جس کی وجہ سے ہمارا مستقبل ہمیشہ خطرے میں رہتا ہے ۔

ہم بھی کرکٹ کوآگے بڑھانے میں کر دار ادا کررہے ہیں اور ہمیں بھی آئی سی سی میں اہمیت ملنی چاہیے انہوں نے کہاکہ ہمیں توقع ہے کہ تمام ارکان اس حوالے سے اپنی آواز اٹھائیں گے ۔چھوٹے ملکوں کو ہمیشہ توجہ کی ضرورت ہے تمام کرکٹ بورڈ ز کو منوہر کے خیالات پر توجہ دینی چاہیے ۔واضح ہے کہ آئی سی سی کے موجودہ نظام کے تحت ریونیو کا 22فیصد بھارت کو ملتا ہے جبکہ انگلینڈ اور آسٹریلیا کو بالترتیب 4.5اور 2.9فیصد حصہ ملتا ہے ٗ جنوبی افریقہ کو 1.3فیصد جبکہ ویسٹ انڈیز اور دیگر بورڈز کا حصہ ایک فیصد سے بھی کم ہے ۔