آرٹ کو سیاست سے دور رکھنا بہتر ہے، میں نے بہت سے ممالک میں نسل پرستی کا سامنا کیا، سونم کپور

ممبئی (اُردو پوائنٹ اخبارتازہ ترین - این این آئی۔12 دسمبر۔2015ء) بالی ووڈ اداکارہ سونم کپور نے کہا ہے کہ میرے لئے عدم برداشت ایک بہت وسیع اصطلاح ہے، میں نے بہت سے ممالک میں نسل پرستی کا سامنا کیا ہے، اگر ہمارے ملک سے لوگ دوسرے ممالک میں کام کر سکتے ہیں تو مجھے نہیں لگتا کہ دوسرے ممالک سے یہاں آکر فنکاروں کے کام کرنے میں کوئی مسئلہ ہوگا۔میڈیا سے گفتگو کرتے ہوئے سونم کپور نے کہا کہ میرے خیال سے آرٹ کو سیاست سے دور رکھنا بہتر ہے، میں نے پاکستانی اداکار فواد خان کیساتھ کام کیا ہے اور میں یہ کہہ سکتی ہوں کہ وہ ایک بہترین فنکار ہیں۔

بھارت میں بڑھتی عدم برداشت کے حوالے سے سونم کپور نے کہا کہ ملک میں گزشتہ 60 سالوں میں پیش آنیوالے فسادات سب نے دیکھے ہیں اس لئے اس بات کو نظر انداز کرنا مناسب نہیں کہ ملک میں عدم برداشت بڑھتی جارہی ہے۔

(جاری ہے)

سونم کپور نے عامر خان کا دفاع کرتے ہوئے کہا کہ لوگوں نے عامر کا مکمل انٹرویو سننے کی بجائے ان کے ایک بیان کو لیکر تنقید کا نشانہ بنایا جو غلط ہے، اگر کوئی میری کارکردگی پر تنقید کرے اس کا یہ مطلب نہیں کہ وہ مجھ سے نفرت کرتا ہے بلکہ وہ مجھے بہتر کرنے کی کوشش کر رہا ہے۔

سونم کپور نے کہا کہ آپ کے خیال میں کیا عامر اب کبھی میڈیا پر کوئی بیان دے پائینگے؟ خعامر ایک سمجھدار انسان ہیں اور انہیں وطن مخالف کہنا غلط ہوگا۔ ان کا بیان یقینا کافی سخت ہوگا لیکن غیر متعلق نہیں ہے۔