بھارت کی ببلی نے اپنے بچے کا نام ٹیکسی کمپنی اوبر کے نام پر رکھ دیا

نئی دہلی(اردو پوائنٹ تازہ ترین اخبار.16دسمبر 2015 ء) ہسپتال جاتےہوئے اوبر کی ٹیکسی کی پچھلی سیٹ پر پیدا ہونے والے بچے کی ماں ببلی نے اس کا نام ٹیکسی کمپنی کے نام پر اوبر رکھ دیا ہے۔ بچے کی ماں ببلی نے ہسپتال جانے کے لیے ایمبولینس کو کال کی مگر جواب نہ ملنے پر اوبر کی ٹیکسی بک کر لی۔ ٹیکسی کے ڈرائیور شاہ نواز نے بتایا کہ اس نے ببلی کو دو اور عورتوں کے ساتھ اٹھایا، انہیں صفدرجنگ ہسپتال دہلی پہنچانا تھا کہ راستے میں ہی اوبر پیدا ہوگیا۔

(جاری ہے)

شاہ نواز نے بتایا کہ عورت کے ساتھ موجوددو عورتوں کو کچھ سمجھ نہیں آرہا تھا کہ کیا کریں، ایسے میں شاہ نواز نے گاڑی کی سیٹ کے نیچے سے تولیے اور کپڑے نکال کر دئیے ، جس سےٹیکسی کو ہی میٹرنٹی روم میں بدلنا ممکن ہوگیا۔ شاہ نواز جب ہسپتال کی ایمرجنسی میں پہنچا تو اوبر پیدا ہوچکا تھا۔ شاہ نواز نے ٹائمز آف انڈیا کو بتایا کہ اسے بچے کےصحت مند ہونے کی خوشی ہے۔شاہ نواز کے حسن سلوک سے متاثر ہو کر ببلی نے اپنے بچے کا نام اوبر رکھ دیا ہے۔ بچے کا نام رکھنے کے لیے ایک تقریب کا انعقاد کیا جائے گا، جس میں بچے کے خاندان والوں نے شاہ نواز کو بھی مدعو کیا ہے۔