دوحہ نمائشی میچ ، سلمان بٹ ٹیم میں واپس آتے ہی کپتان بن گے،پہلی ہی آزمائش میں ناکام

دوحا(اُردو پوائنٹ اخبارتازہ ترین - آئی این پی۔20 دسمبر۔2015ء) فکسنگ میں سزا یافتہ کھلاڑیوں نے فاسٹ ٹریک پر ٹیم کی جانب واپسی کا سفر جاری رکھا ہوا ہے، سلمان بٹ بھی نمائشی مگر اہم مقابلے میں گرین شرٹ زیب تن کرتے ہی ”کپتان“ بن گئے، وہ اپنی زیر قیادت پاکستان اسٹارز کو قطرسے میچ میں فتح نہ دلاسکے، کئی تجربہ کار پاکستانی کھلاڑیوں کی موجودگی کے باوجود 10 رنز سے شکست مقدر بن گئی۔

تفصیلات کے مطابق برس قبل انگلینڈکے ہوم آف کرکٹ لارڈز پر چند لاکھ روپوں کی خاطر ملک و قوم کو رسوا کرنے والے سزا یافتہ کرکٹرز کی فاسٹ ٹریک پر ٹیم میں واپسی کا سفر جاری ہے، فاسٹ بولر عامر تو ٹیم سلیکشن کے تقریباً قریب پہنچ چکے جب کہ سلمان بٹ بھی خاموشی سے مسافت طے کرنے میں مصروف ہیں۔

(جاری ہے)

دوحا کے ایشین ٹاؤن کرکٹ اسٹیڈیم میں قطر کے قومی دن کی مناسبت سے ایک نمائشی میچ کھیلا گیا۔

جس میں قطر اسٹارز کے خلاف پاکستان اسٹارز کی قیادت سلمان بٹ نے کی، مگر کئی اسٹار پلیئرز کی موجودگی کے باوجود ان کی ٹیم 10 رنز سے ہار گئی، اس ٹیم میں فکسنگ میں سزا یافتہ ایک اورپلیئر محمد آصف کے ہمراہ کامران اکمل، عدنان اکمل، فواد عالم، اعزاز چیمہ، توفیق عمر، سعیداجمل، رانا نوید، عمران فرحت اور احسان عادل شامل تھے۔قطر کا اسکواڈ بھی چند پاکستانی کھلاڑیوں سے سجا ہوا تھا، اس میں شرجیل خان، سعد نسیم اور ناصر جمشید وغیرہ موجود تھے۔

پہلے بیٹنگ کرتے ہوئے میزبان سائیڈ نے مقررہ 20 اوورز میں 147 رنز بنائے، جواب میں پاکستانی ٹیم 7 وکٹ پر 135 رنز ہی بنا پائی۔ اس میچ کو دیکھنے کیلیے تارکین وطن کی بڑی تعداد نے اسٹیڈیم کا رخ کیا، مجموعی طور پر17 ہزار تماشائی اسٹیڈیم میں موجود رہے۔