امریکا اور برطانیہ میں سیلاب کی تباہ کاریاں جاری

منگل 5 جنوری 2016 12:18

امریکا اور برطانیہ میں سیلاب کی تباہ کاریاں جاری

نیویار ک/لندن(اُردو پوائنٹ اخبارتازہ ترین - آن لائن۔05 جنوری۔2016ء) امریکا اور برطانیہ میں سیلاب کی تباہ کاریاں جاری ہیں جبکہ چین میں بھی شدید برفباری نے زندگی کا نظام درہم برہم کردیا۔ پولینڈ میں شدید سردی سے مرنے والوں کی تعداد 41 ہو گئی۔امریکا کی ریاستوں میزوری اور الینوائے میں طوفانی بارشوں اور سیلاب سے ہلاکتوں کی تعداد تینتیس ہو گئی ہے۔

ریاست ٹینیسی کے دریائے میسیپی میں آئندہ چند روز میں پانی کی سطح میں خطرناک حد تک اضافے سے شدید سیلاب کا امکان ظاہر کیا گیا ہے۔برطانیہ میں بھی سیلاب کی تباہ کاریاں جاری ہیں۔ انگلینڈ، ویلز اور شمالی آئر لینڈ میں بارشوں اور سیلاب سے متعدد مکانات، سڑکیں اور پْل تباہ ہو گئے۔ اسکاٹ لینڈ میں سیلاب سے 400 سالہ قدیم عمارت کے ڈوب جانے کا خطرہ پیدا ہو گیا ہے۔

(جاری ہے)

ادھرشمال مشرقی چین کے صوبہ زنجیانگ میں دس روز سے جاری برف باری میں متعدد سیاح پھنس کر رہ گئے ہیں۔ کئی علاقوں میں دو میٹر برف پڑ چکی ہے جس کے باعث ٹریفک کا نظام درہم برہم ہو کر رہ گیا ہے۔ پولیس ، فوج اور ریسکیو اہلکار متاثرہ علاقوں میں بند سڑکیں کھولنے کے لیے امدادی کارروائیوں میں مصروف ہیں۔پولینڈ میں سردی کی شدید لہر سے مزید اکیس افراد ہلاک ہو گئے جس کے بعد سردی سے مرنے والوں کی تعداد 40سے تجاوز کر گئی ہے۔ درجہ حرارت منفی 18ڈگری تک گر گیا ہے۔ حکام نے لوگوں کو ہدایت کی ہے کہ وہ سردی سے بچنے کے لیے احتیاطی تدابیر اختیار کریں اور گھروں سے باہر نہ نکلیں۔

متعلقہ عنوان :