بھارتی انڈر 19کرکٹ ٹیم کے کپتان ایشان کشن غیر ذمہ درانہ ڈرائیونگ پر گرفتار

Zeeshan Mehtab ذیشان مہتاب بدھ 13 جنوری 2016 13:34

بھارتی انڈر 19کرکٹ ٹیم کے کپتان ایشان کشن غیر ذمہ درانہ ڈرائیونگ پر ..

پٹنہ(اردو پوا ئنٹ تازہ ترین اخبار13جنوری- 2016ء) انڈ ر 19ورلڈ کپ سے پہلے ہی بھارتی کرکٹ ٹیم کو بڑا جھٹکا لگ گیا ،بلیو شرٹس کے کپتان ایشان کشن کو پٹنہ پولیس نے غیر محتاط ڈرائیونگ پر گرفتار کر لیا ۔

(جاری ہے)

تفصیلات کے مطابق بھارتی انڈر 19کرکٹ ٹیم کے کپتان ایشان کشن نے منگل کی رات اپنے والد کی گاڑی پر خطر ناک ڈرائیونگ کرتے ہوئے رکشے میں پیچھے سے دے ماری جس سے رکشے میں موجود افراد زخمی ہوئے ، اس دوران جائے حادثہ پر ہجوم اکٹھا ہوا اور ایشان نے اپنی غلطی ماننے کی بجائے ان سے لڑائی شروع کر دی جس پر ہجوم نے انہیں خوب مارا اور اسی اثناء میں کسی شہری کی جانب سے پٹنہ پولیس کو اطلاع دیئے جانے پر اس نے موقع پر پہنچ کر ایشان سمیت لڑائی کرنے والے دیگر افراد کوگرفتار کرنے کے ساتھ ساتھ گاڑی کو بھی قبضے میں لے لیا ۔

17سالہ ایشان کشن کو بی سی سی آئی نے دسمبر 2015ء میں بھارتی کرکٹ ٹیم کا کپتان مقرر کیا تھا ، انہوں نے 2014ء اور 2015ء کے دوران 10رانجی ٹرافی میچز میں 40.89کی اوسط سے 736رنز بنا ررکھے ہیں جس میں 1سنچری اور 5نصف سنچریاں شامل ہیں ۔انڈر 19کرکٹ ور لڈ کپ 27جنوری سے بھارت کے شہر بنگلور میں شروع ہو رہا ہے اور بھارت ایونٹ میں اپنا پہلا میچ 28جنوری کو آئر لینڈ کے خلاف کھیلے گا ۔