شہری دُھند میں محفوظ سفرکیلئے اوورٹیکنگ اور تیز رفتاری سے اجتناب کریں‘ آصف صدیق

جمعہ 15 جنوری 2016 14:56

لاہور( اُردو پوائنٹ اخبارتازہ ترین - این این آئی۔15 جنوری۔2016ء) ایس پی سٹی ٹریفک آصف صدیق نے کہا ہے کہ شہری دھندلے موسم میں محفوظ سفر کیلئے فوگ لائٹس کا استعمال کریں تاکہ سامنے سے آنے والی ٹریفک کو دیکھنے میں دقت نہ ہو، شہری دھند میں اگلی گاڑی سے مناسب فاصلہ رکھتے ہوئے گاڑی چلائیں اورگہری دھند ہونے پر گاڑی کے چاروں انڈیکیٹرزکو چلائے رکھیں۔

گاڑی کے سائیڈ شیشوں کو مکمل طور پر بند نہ کریں تاکہ فرنٹ سکرین اورسائیڈ ونڈوزپر اوس جمنے نہ پائے ،شہری اپنی حفاظت کیلئے گاڑی کی ونڈسکرین صاف کرنے کیلئے ہاتھ اور سر ہر گز باہر مت نکالیں۔دھند میں گاڑی کو روڈ پر پارک نہ کیا جائے،سائیڈ پر گاڑی پارک کریں اورگاڑی کے انڈیکیٹرزآن رکھیں۔ دھند میں شہری اوور ٹیک کرنے سے اجتناب کریں۔

(جاری ہے)

آصف صدیق نے کہاکہ دھندلے موسم اور رات کے وقت حادثات کی ایک بڑی وجہ گاڑیوں کی بیک لائٹس کادرست حالت میں نہ ہونا اور لوڈر گاڑیوں کے پیچھے ریفلیکٹرز کا نہ ہونا ہے۔

سریا،ٹی آئرن،چارہ بھوسہ،ریت و بجری اور دیگر لوڈرگاڑیوں کے پیچھے مناسب لائیٹس اور ریفلیکٹر ز نہ ہونے پر ایسی گاڑیوں کیخلاف کاروائی کی جائے۔انہوں نے ڈی ایس پی صاحبان کو ہدایت کی کہ وہ ایسی گاڑیوں کے ڈرائیورز اور مالکان کوتنبیہ کریں کہ وہ اپنی گاڑیوں کے پیچھے مناسب لائیٹس اور ریفلیکٹر ز لگائیں تاکہ رات کے وقت پیچھے سے آنے والی گاڑیوں کو گزرتے ہوئے کوئی پر یشا نی نہ ہو۔ایس پی سٹی نے شہریوں کو ہدایت کی کہ وہ اپنی اور دوسروں کی حفاظت کیلئے احتیاطی تدابیر استعمال کر تے ہوئے سفر کریں۔