نکاح پر نکاح کیس،اداکارہ میرا کا شوہر ہونے کے دعویدار عتیق الرحمان اور کیپٹن نوید کے وارنٹ جاری

لاہور(اُردو پوائنٹ اخبارتازہ ترین - آن لائن۔23 جنوری۔2016ء) اداکارہ میراکیخلاف نکاح پر نکاح کیس کی سماعت کینٹ کچہری کے جوڈیشل مجسٹریٹ کی عدالت میں ہوئی۔فاضل عدالت نے اداکارہ میرا کے شوہر ہونے کے دعویدار عتیق الرحمان اور کیپٹن نوید کے بلا ضمانت وارنٹ گرفتاری جاری کر دئیے ہیں۔سر پر ٹوپی ، آنکھوں پر چشمہ لگائے خوب سج دھج کر عدالت آنے والی اداکارہ میرا نے مذکورہ کیس خارج کرنے کیلئے بھی عدالت میں درخواست دائر کر دی ہے، کینٹ کچہری میں کیس کی سماعت کے دوران اداکارہ میرا نے عدالت میں موقف اپنایا کہ عتیق الرحمان نے سستی شہرت کیلئے مجھے بدنام کیا۔

اداکارہ کے وکیل نے دلائل دیئے کہ ان کی موکلہ کے خلاف بے بنیاد ثبوتوں کی بنیاد پر دعویٰ دائر کیا گیااورعتیق الرحمان نے جھوٹا مقدمہ بنایا مدعی کے وکلا عدالت میں پیش نہیں ہورہے لہٰذا مقدمہ خارج کیا جائے۔

(جاری ہے)

کینٹ کچہری میں نکاح پر نکاح کیس کی سماعت کے بعد میڈیا سے گفتگو کرتے ہوئے اداکارہ میرانے کہا کہ رواں سال شادی کرلوں گی موسم اچھا ہے ، سردی ہورہی ہے ،مجھے سردیوں کا موسم اچھا لگتا ہے اور میں نے سردی کیلئے امریکہ سے کوٹ لیا ہے۔

ایک سوال کے جواب میں میرا نے کہا کہ وہ ایان علی کو کاپی نہیں کرتی ہیں، میری اپنی پہچان ہے کسی کو کاپی نہیں کرتی بلکہ سب مجھے کاپی کرتے ہیں۔لوگوں کو لگتا ہے لیکن مجھے اپنی عمر ڈھلتی نظر نہیں آرہی ،مجھے تو فلمیں بھی مل رہی ہیں اور ڈرامے بھی ، اس وقت بھی تین پروجیکٹس پر کام کررہی ہوں۔انہوں نے کہا کہ عمران خان میرے بزرگ ہیں اور ان کی قدر کرتی ہوں ، وہ قومی ہیرو ہیں ان کا اور میرا مذاق نہ بنایا جائے۔

لالی ووڈ اداکارہ میرا نے ایک بار پھر شادی کی خواہش کا اظہار کرتے ہوئے کہا کہ وہ اسی سال شادی کر لیں گی۔لاہور میں نکاح پر نکاح کے الزام میں عدالت پیشی کے موقع پر میڈیا سے گفتگو کرتے ہوئے اداکارہ میرا کا کہنا تھا کہ شوبز انڈسٹری میں میری اپنی پہچان ہے، ان کا کہنا تھا کہ میں نے کوئی خفیہ شادی نہیں کی، جب بھی شادی کروں گی تو سب کو بتا کر کروں گی۔سج دھج کر عدالت میں پیش ہونے سے متعلق پوچھے گئے سوال پر میرا کا کہنا تھا کہ سردی بننے سنورنے کا موسم ہوتا ہے اس لئے اس قسم کا لباس پہناہے