ارباز خان اور ملائیکا کا17سال بعد الگ ہونے کا فیصلہ

ممبئی (اُردو پوائنٹ اخبارتازہ ترین - این این آئی۔31 جنوری۔2016ء)بالی ووڈ ہدایت کار اور اداکار فرحان اختر کی طلاق کے بعد اب میڈیا میں سلمان خان کے بھائی ارباز خان کی اہلیہ ملائیکا اروڑا سے علیحدگی کی خبریں گردش کر رہی ہیں۔بھارتی اخبار کی ایک رپورٹ کے مطابق قیاس آرائیاں ہیں کہ ارباز خان اور ملائیکا اروڑا خان اپنی 17 سالہ شادی کو ختم کرنے کا فیصلہ کر چکے ہیں۔

رپورٹس کے مطابق ملائیکا، ارباز خان کے بندرا میں واقع فلیٹ کو چھوڑ کر اپنے بیٹے ارحان کے ساتھ ایک دوسرے فلیٹ میں منتقل ہوچکی ہیں، واضح رہے کہ اسی عمارت میں اْن کی بہن امریتا اروڑا کا سسرال بھی رہائش پذیر ہے-ملائیکا اروڑا کی کئی عرصے سے برطانیہ کے ایک بزنس مین کے ساتھ دوستی کی افواہیں بھی میڈیا میں گردش کر رہی ہیں، تاہم ملائیکا کے مینیجر نے ان خبروں کو جھوٹی افواہیں قرار دیا تھا-واضح رہے کہ یہ جوڑا ایک ٹیلی ویڑن شو پاور کپل کی میزبانی کے فرائض بھی انجام دے رہا تھا، تاہم کئی روز سے ملائیکا اس شو میں ارباز کے ساتھ نظر نہیں آرہیں-شو کے ذرائع کے مطابق دسمبر سے شروع ہونے والی اس شوٹنگ کے دوران ملائیکا اور ارباز وقفے کے دوران نہ تو ایک دوسرے سے بات کرتے دکھائی دیئے اور نہ ہی ایک ساتھ وقت گزارتے تھے۔

(جاری ہے)

حال ہی میں ارباز خان کی بہن ارپیتا کی دبئی میں ہونے والی گود بھرائی کی رسم میں بھی ملائیکا غیر حاضر رہیں۔یاد رہے کہ دونوں دسمبر 1998 کو شادی کے بندھن میں بندھے تھے۔