پانامہ لیکس، حکومت نے اپوزیشن کو بھر پور جواب دینے کا فیصلہ کر لیا’پاکستان تحریک انصاف کے اہم رہنماوں کے خلاف شواہد اکٹھے کر لیے گئے

سمیرا فقیرحسین پیر 25 اپریل 2016 16:10

اسلام آباد(اُردو پوائنٹ تازہ ترین اخبار۔25 اپریل 2016ء) : پانامہ لیکس نے پاکستان سمیت دنیا بھر میں ایک سیاسی ہلچل پیدا کی۔ جس پر جہاں عالمی رہنماؤں سے استعفوں کا مطالبہ یا گیا وہیں پاکستان میں بھی اپوزیشن نے حکومت کو اس معاملے پر ٹف ٹائم دینے کی ٹھانی اور وزیر اعظم نواز شریف سے پانامہ لیکس کے معاملے پر وضاحت طلب کرتے ہوئے ان سے اپنے عہدے کو خیر باد کہنے کا بھی مطالبہ کیا گیا۔

جہاں اپوزیشن نے حکومت کو ف ٹائم دیا وہیں اب حکومت نے بھی اپوزیشن کو ٹف ٹائم دینے کی ٹھان لی اور اسی ضمن میں پاکستان تحریک انصاف کے رہنماؤں کے خلاف شواہد اکٹھے کر لیے گئے ہیں۔ پانامہ لیکس پر پی ٹی آئی چئیر مین عمران خان نے ایک جانب سندھ کا رخ کیا اور دوسری جانب انہوں نے پنجاب کا پروگرام دے دیا ۔

(جاری ہے)

جس پر حکومتی حلقوں نے بھی جوابی حکمت عملی مرتب کرتے ہوئے پی ٹی آئی کے اہم رہنماؤں کے خلاف شواہد اکٹھا کر لئے ہیں۔

ذرائع کے مطابق پانامہ لیکس پر انکوائری کمیشن کی تشکیل ہوتے ہی پی ٹی آئی کے رہنماؤں کے بارے میں بھی اہم شواہد منظر عام پر لائے جائیں گے ۔حکومتی حلقوں کی جانب سے عمران خان اور ان کے مالی طور پر مستحکم قریبی ساتھیوں کو نشانہ بنایا جائے گا ۔ پی ٹی آئی کے اہم رہنماؤں کے اندرون و بیرون ملک کاروبار اور مالی امور کی تفصیلات تک حکومتی اداروں نے بھی رسائی حاصل کرلی ۔

ای او بی آئی ، قومی بنکوں کے قرضوں اور رئیل اسٹیٹ کے امور کی تفصیلات بھی حاصل کر لی گئی ہیں ۔ پی ٹی آئی کے رہنماؤں کے بارے میں حاصل دستاویزات پر سیاسی کارڈ حکومت ایک حکمت عملی کے تحت کھیلے گی ۔ حکومتی حلقوں نے صاف بتادیا اب محض خاموشی سے کام نہیں چلے گا بلکہ اب پی ٹی آئی کے رہنماؤں کا نامہ اعمال بھی سامنے لایا جائے گا ۔پانامہ لیکس پر اپوزیشن جماعتیں بھی باہم رابطے میں ہیں تاہم آئندہ کے لیے طے کیے جانے والے لائحہ عمل کے حوالے سے اپوزیشن کا اجلاس دو مئی کو ہوگا ۔