آصف علی زرداری نے سندھ کے تنظیمی معاملات فریال تالپور اور آصفہ بھٹو کے حوالے کر دیئے

ڈاکٹر عاصم کیس میں وکلا ء کی کارکردگی پر عدم اطمینان کا اظہار ،قانونی مشاورت کیلئے اعتزاز احسن، لطیف کھوسہ اور فاروق نائیک طلب

ہفتہ 24 دسمبر 2016 20:00

کراچی (اُردو پوائنٹ اخبارتازہ ترین - این این آئی۔ 24 دسمبر2016ء) پیپلزپارٹی کے شریک چیئرمین و سابق صدر آصف علی زرداری نے سندھ کے تنظیمی معاملات فریال تالپور اور آصفہ بھٹو کے حوالے کر دیئے، ڈاکٹر عاصم کیس میں وکلا ء کی کارکردگی پر عدم اطمینان کا اظہار کر دیا۔ آصف علی زرداری نے ڈیڑھ سال کے بعد وطن واپس آتے ہی سیاسی اور پارٹی سر گرمیاں تیز کر دی ہیں۔

آصف زرداری اوربلاول بھٹو کی زیر صدارت پارٹی کا اہم اجلاس ہوا جس میں سنٹرل ایگزیکٹو کمیٹی کے ارکان سندھ کے عہدیداروں نے شرکت کی۔

(جاری ہے)

سندھ کے تنظیمی معاملات کا مکمل اختیار فریال تالپور اور آصفہ بھٹو کو سونپ دیا۔ سابق صدر نے ڈاکٹر عاصم کیس کے وکلا ء کی کارکردگی پر عدم اطمینان کا اظہار کیا۔ قانونی مشاورت کیلئے اعتزاز احسن، لطیف کھوسہ اور فاروق نائیک کو طلب کر لیا۔

بتایا گیا ہے کہ آصف زرداری ڈاکٹر عاصم سے ہسپتال میں ملاقات بھی کرینگے۔ بتایا گیا ہے کہ اصف علی زرداری محترمہ بے نظیر بھٹو کی برسی میں شرکت کے لئے آج لاڑکانہ روانہ ہونگے۔ حکومت مخالف تحریک پر غور اور آئندہ کی حکمت عملی کیلئے 27 دسمبر کو پارٹی کی سینٹرل ایگزیکٹو کمیٹی کا اجلاس نوڈیرو ہاس میں طلب کر لیا گیاہے۔