اسرائیل کے ساتھ مشروط مذاکرات بحال کرنے پر تیار ہیں، محمود عباس، اسرائیل کو یہودی آباد کاری روکنا ہوگی

جمعرات 29 دسمبر 2016 11:23

غزہ سٹی ۔ (اُردو پوائنٹ اخبارتازہ ترین - اے پی پی۔ 29 دسمبر2016ء) فلسطینی اتھارٹی کے سربراہ محمود عباس نے اسرائیل کے ساتھ مشروط طور پر امن مذاکرات بحال کرنے کی خواہش کا اظہار کیا ہے۔ ان کا کہنا ہے کہ ایک تزویراتی آپشن کے طور پر وہ منصفانہ قیام امن کی مساعی میں ہر ممکن مدد دینے کو تیار ہیں۔

(جاری ہے)

فلسطین کے سرکاری خبر رساں ادارے ’وفا‘ کی طرف سے جاری کردہ بیان میں کہا گیا ہے کہ اگر اسرائیلی حکومت مشرقی بیت المقدس سمیت تمام فلسطینی علاقوں میں یہودی توسیع پسندانہ سرگرمیوں پر پابندی اور دو طرفہ سمجھوتوں پر عمل درآمد کا اعلان کرے تو وہ تل ابیب کے ساتھ امن بات چیت بحال کرنے کے لیے تیار ہیں۔

صدر عباس کا کہنا ہے کہ امن بات چیت عالمی قوانین، بین الاقوامی قراردادوں بالخصوص حال ہی میں منظور کی جانے والی سلامتی کونسل کی قرارداد 2334 کی روشنی میں ہونے چاہئیں۔ بات چیت شروع کرنے سے قبل مسئلہ فلسطین کے حل اور خود فلسطینی ریاست کے قیام کے لیے ٹائم فریم دیا جائے تاکہ مذاکرات کو حتمی شکل دے دی جائے گی۔