احتساب عدالت نے کرپشن کیس میں شرجیل میمن کے ناقابل ضمانت وارنٹ گرفتاری جاری کرتے ہوئے سماعت 14جنوری تک ملتوی کردی

ہفتہ 7 جنوری 2017 14:57

کراچی(اُردو پوائنٹ اخبارتازہ ترین - این این آئی۔ 07 جنوری2017ء) مقامی احتساب عدالت نے 5 ارب روپے کی کرپشن کے ریفرنس میں سندھ کے سابق وزیراطلاعات شرجیل انعام میمن کے ناقابل ضمانت وارنٹ گرفتاری جاری کرتے ہوئے سماعت 14جنوری تک ملتوی کردی ہے۔ہفتہ کوکراچی کی احتساب عدالت میں سابق وزیراطلاعات سندھ شرجیل انعام میمن اوردیگرملزمان کے خلاف 5 ارب روپے سے زائد کی کرپشن سے متعلق ریفرنس کی سماعت ہوئی۔

سماعت کے دوران شرجیل میمن کے وکیل نے عدالت کے روبروموقف اختیارکیا کہ ان کے موکل دبئی میں شدید علیل اوراسپتال میں زیرعلاج ہیں، سندھ ہائی کورٹ میں ان کی ضمانت میں توسیع کی درخواست زیرسماعت ہے اور اس درخواست پر10 جنوری کو فیصلہ آنے کی توقع ہے اس لیے عدالت سے استدعا ہے کہ مقدمے کی سماعت ملتوی کی جائے۔

(جاری ہے)

شرجیل میمن کے وکلا کی درخواست پرنیب پراسیکیوٹر نے موقف اختیار کیا کہ شرجیل میمن جان بوجھ کر پیش نہیں ہورہے، سندھ ہائی کورٹ نے شرجیل میمن کی درخواست ضمانت پر کوئی حکم جاری نہیں کیا لہذا ملزم کے ناقابل ضمانت وارنٹ گرفتار ی جاری کئے جائیں۔

عدالت نے شرجیل میمن کے پیش نہ ہونے پرناقابل ضمانت وارنٹ گرفتاری جاری کرتے ہوئے سماعت 14 جنوری تک کے لئے ملتوی کردی۔واضح رہے کہ شرجیل میمن پرالزام ہے کہ انہوں نے دیگرملزمان کے ساتھ ملی بھگت کرکے اشتہارات کی مد میں جاری کی گئی رقم میں 5 ارب روپے سے زائد کی کرپشن کی ہے۔

متعلقہ عنوان :