جو لوگ نائن زیرو کا قبضہ نہیں چھڑا سکتے وہ سندھ کا وزیراعلیٰ لانے کا دعویٰ کرتے ہیں، سینیٹر سعید غنی

کراچی (اُردو پوائنٹ اخبارتازہ ترین - آن لائن۔ 08 جنوری2017ء) پاکستان پیپلز پارٹی کراچی کے جنرل سیکریٹری سعید غنی نے کہا ہے کہ جو لوگ نائن زیرو کا قبضہ نہیں چھڑا سکتے وہ سندھ کا وزیراعلیٰ لانے کا دعویٰ کرتے ہیں، ڈاکٹر عاصم حسین کے مقدمات میں تاخیری حربے استعمال کیے جارہے ہیں ، مقدمات کی سماعت جلد ہونی چاہئے، تاخیر سے ڈاکٹر عاصم کی قانونی حق تلفی ہورہی ہے، پیپلز پارٹی کراچی پر قبضہ نہیں چاہتی بلکہ وہ سیاسی جدوجہد کے ذریعے آئندہ انتخابات جیتنا چاہتے ہیں، بہت جلد ایم کیو ایم تحریک انصاف اور مسلم لیگ نون کے بڑے نام پیپلزپارٹی میں شمولیت کا اعلا ن کریں گے۔

ان خیالات کا اظہار انہوں نے اتوار کو پیپلز پارٹی سندھ میڈیا سیل میں ایم کیوایم ، پی ایس پی ، مجلس وحدت المسلمین، آل پاکستان مسلم لیگ اور اے این پی کارکنان کی جانب سے ملاقات کے بعد پاکستان پیپلز پارٹی میں شمولیت کے اعلان کے موقع پر منعقدہ پریس کانفرنس سے خطاب کرتے ہوئے کیا۔

(جاری ہے)

اس موقع پر انکے ہمراہ پی پی پی رہنما راشد ربانی بھی موجود تھے۔

سینیٹر سعیدغنی نے کہا کہ بڑی تعداد میں لوگ ہیں جو اپنی شمولیت کا اعلان کرنا چاہتے ہیں اور آنے والے دنوں میں یہ سلسلہ جاری رہے گا۔ کئی سیاسی جماعتوں کے ورکرز پیپلزپارٹی سے رابطے میں ہیں ۔ انہوں نے دعویٰ کیا کہ بہت جلد ایم کیو ایم تحریک انصاف اور مسلم لیگ نون کے بڑے نام پیپلزپارٹی میں شمولیت کا اعلا ن کریں گے۔ کراچی کی ترقی کے لئے سب مل کر کام کریں گے۔

سینیٹر سعید غنی نے کہا کہ پیپلز پارٹی کراچی پر قبضہ نہیں چاہتی بلکہ وہ سیاسی جدوجہد کے ذریعے آئندہ انتخابات جیتنا چاہتے ہیں ۔شہر سے بچی کھچی غنڈہ گردی جمہوری انداز میں ختم کرادیں گے۔ انہوں نے کہا کہ انصاف میں تاخیر انصاف سے محرومی سمجھا جاتا ہے۔ انہوں نے کہا عدالتوں سے گزارش ہے کہ کیسز کو جلد از جلد سن کر نمٹایا جائے۔ ہم عدالتوں کا احترام کرتے ہیں لیکن گزارش ہے کہ کیسوں کو جلد نمٹا کے انصاف دیا جائے۔

انہوں نے کہا کہ ڈاکٹر عاصم حسین کے مقدمات میں تاخیری حربے استعمال کیے جارہے ہیں ۔ نیب کیسز میں ڈاکٹر عاصم حسین کے مقدمات کی سماعت کے لیے تاریخ مقرر نہیں کی جارہی ہے ۔ جو جج مقدمات نہیں سننا چاہتے ان کی عدالت میں مقدمات نہ لگائے جائیں ۔ سعید غنی نے کہا کہ مقدمات میں ضمانت ڈاکٹر عاصم حسین کا قانونی اور آئینی حق ہے ۔ معزز عدالت سے درخواست ہے کہ وہ آزادی سے فیصلے کریں ۔

ڈاکٹر عاصم حسین کے مقدمات کی سماعت جلد ہونی چاہئے ۔ زیرسماعت مقدمات میں تاخیر سے ڈاکٹر عاصم کی قانونی حق تلفی ہورہی ہے ۔ ڈاکٹر عاصم پیپلزپارٹی کے ٹکٹ پر سینیٹر بنے ہیں۔ ایم کیو ایم کے حوالے سے پوچھے گئے سوال پر سینیٹر سعیدغنی نے کہا کہ سینیٹر سعید غنی نے کہا کہ جو لوگ نائن زیرو کاقبضہ نہیں چھڑاسکتے وہ بھی سندھ کا وزیراعلی لانے کا دعوی کر رہے ہیں ۔

ایم کیوایم رہنما پہلے نائین زیرو کا قبضہ چھڑائیں۔ پھر سندھ کی علیحدگی گی کی بات کریں۔ انہوں نے کہا کہ نوجوان بلاول بھٹو کی قیادت میں کراچی سے نفرتوں کا خاتمہ کریں گے ۔اس موقع پر سینیٹر غنی نے پیپلزپارٹی پارلیمنٹرینز کو ختم کرنے کی خبروں کی تردید کی۔ پیپلز پارٹی میں شامل ہونے والوں میں پی ایس پی کے ثاقب عمر،کامران صدیقی،ایم ڈبلیو ایم کے مولانا خیبر حسین،مولانا نصرت علی، مولانا سجاد، ایم کیوایم کے محمد اسماعیل،زین رضا، احمد بھائی ، نازش، کاشف عبدالماجد،اے این پی کے ظہیر احمد ،صدام،ای پی ایم ایل کورنگی ٹائون کے عقیل خان و دیگر کارکنان شامل ہیں۔

اس موقع پر راشد ر بانی نے کہا کہ پیپلزپارٹی سیاسی ورکرز کا گھر ہے ، پارٹی میں آنے والوں کو خوش آمدید کہیں گے ۔ شہرسے اجارہ داری اور گھٹن کا ماحول ختم ہورہا ہے ۔ #