بلوچستان: دو مغویوں کی لاشیں برآمد

ان افراد کو گذشتہ ہفتے نامعلوم مسلح افراد نے اغوا کیا تھا

جمعہ 13 جنوری 2017 16:47

گوادر(اُردو پوائنٹ اخبارتازہ ترین - آن لائن۔ 13 جنوری2017ء) بلوچستان کے ضلع کچھ اور پنجگور کے علاقے سے اغوا ہونے والے دو مغویوں کی لاشیں برآمد ہوئی ہیں۔خیال رہے کہ ان افراد کو گذشتہ ہفتے نامعلوم مسلح افراد نے اغوا کیا تھا اور انھیں فائرنگ کر کے ہلاک کیا گیا ہے۔ذرائع کے مطابق ایک مغوی کی لاش ضلع کچھ کے علاقے مند کے قریب کتھریز سے ملی۔واقعے کی اطلاع ملتے ہی مقامی انتظامیہ کے عہدیداروں اور لیویز اہلکار جائے وقوعہ پہنچے اور لاش کو ہسپتال منتقل کیا، جہاں اس کی شناخت آزاد ولد چاکر کے نام سے ہوئی۔

لیویز کے سینئر افسر کا کہنا تھا کہ 'مقتول کو گذشتہ ہفتے نامعلوم مسلح افراد نے اغوا کیا تھا'۔ان کا مزید کہنا تھا کہ مغوی کو سینے اور سر میں گولیاں ماری گئی ہیں۔دوسرے مغوی کی لاش ضلع پنجگور کے علاقے کیل کاہور سے برآمد ہوئی جسے لیویز اہلکاروں نے ہسپتال منتقل کیا، جہاں اس کی شناخت بہرام ولد خدا بخش کے نام سے کی گئی۔

(جاری ہے)

لیویز حکام کا کہنا تھا کہ 'بہرام کو نامعلوم افراد نے ضلع پنجگور کے علاقے سے ہی اغوا کیا تھا' اور اس کے جسم پر متعدد گولیوں کے نشانات ہیں۔واضح رہے کہ دونوں مغویوں کے اغوا اور ان کی ہلاکت کی وجہ معلوم نہیں ہوسکی ہے، جبکہ کسی گروپ نے ان کے اغوا اور قتل کرنے کی ذمہ داری بھی قبول نہیں کی ہے۔لیویز اہلکاروں نے مغویوں کے قتل کی تحقیقات کا آغاز کردیا ہے۔