افغان فضائیہ کی ننگرہار میں بمباری ، داعش کے 42 جنگجو ہلاک،65 گھر نذر آتش

ہلمندمیں فورسز کا آپریشن، طالبان کے فرضی گورنر سمیت 12جنگجو ہلاک

اتوار 15 جنوری 2017 12:50

کابل(اُردو پوائنٹ اخبارتازہ ترین - آن لائن۔ 15 جنوری2017ء) افغان فورسز نے صوبہ ننگرہار میں بمباری کے دوران داعش کی42 شدت پسندوں کی ہلاکت کا دعویٰ کیا ہے، داعش جنگجوؤں نے 65 گھروں کو نذر آتش کردیا۔داعش شدت پسند ننگرہار میں افغان فضائیہ کی بمباری میں مارے گئے۔ داعش نے ننگرہار صوبے میں 65 گھروں کو آگ لگا دی۔ مقامی حکام کا کہنا ہے کہ داعش نے ضلع کوٹ میں شہریوں کے گھروں کو آگ لگا دی۔

دریں اثنا ضلع سنگین میں طالبان کے فرضی گورنر سمیت 12جنگجو مارنے کا دعویٰ بھی کیا گیا ہے۔صوبائی گورنرکے ترجمان عطااللہ کھوگیانی نے بتایا کہ فضائی کارروائی ضلع آچن،کوٹ اور رودات میں کی گئی جس میں دہشت گردوں کے ٹھکانوں کو نشانہ بنایا گیا جبکہفضائی کارروائی میں داعش کے متعدد ٹھکانے اور اسلحہ کے ذخیر ے تباہ کردیے گئے۔

(جاری ہے)

فضائی کارروائی کے دوران شہریوں کا کوئی جانی نقصان نہیں ہوا۔

ننگرہارمیں مقامی حکام کا کہنا ہے کہ داعش نے ضلع کوٹ میں شہریوں کے گھروں کو آگ لگا دی تاہم صوبائی گورنرکے ترجمان عطااللہ کھوگیانی نے واقعے کی تصدیق کرتے ہوئے بتایا ہے کہ کوئی جانی نقصان نہیں ہوا۔دوسری جانب صوبہ ہلمند میں سیکیورٹی فورسز کے آپریشن میں طالبان کے فرضی گورنر سمیت 12جنگجو ہلاک ہوگئے۔صوبے میں ایک فوجی ترجمان نے بتایا ہے کہ آپریشن ضلع سنگین میں کیا گیا۔