لبنان، حزب اللہ نے تباہ شدہ اسرائیلی ڈرون کا ملبہ اٹھا لیا

یہ بغیر پائیلٹ جاسوس طیارہ لبنان کے سرحدی علاقے میں گر کر تباہ ہوگیا تھا،اسرائیلی فوج کا بیان

بدھ 18 جنوری 2017 12:24

بیروت(اُردو پوائنٹ اخبارتازہ ترین - این این آئی۔ 18 جنوری2017ء) لبنان کی شیعہ ملیشیا حزب اللہ نے ملک کے سرحدی علاقے میں اسرائیل کے ایک تباہ شدہ ڈرون کا ملبہ برآمد کر لیا ہے اور اس کو معائنے کے لیے کسی محفوظ مقام پر منتقل کردیا ہے۔غیرملکی خبررساں ادارے کے مطابق اسرائیلی فوج نے ایک بیان میں کہا کہ یہ بغیر پائیلٹ جاسوس طیارہ لبنان کے سرحدی علاقے میں گر کر تباہ ہوگیا تھا۔

اس نے اس ڈرون کی شناخت ٹیکٹیکل اسکائی لارک یو اے وی کے نام سے کی تھی۔

(جاری ہے)

واضح رہے کہ اسرائیل کے بغیر پائیلٹ جاسوس طیارے پڑوسی ممالک کی فضائی حدود میں انٹیلی جنس معلومات کے حصول کے لیے پروازیں کرتے رہتے ہیں۔ایران کی حمایت یافتہ حزب اللہ ملیشیا کی اسرائیلی فوج کے ساتھ حالیہ برسوں کے دوران میں متعدد جنگیں ہوچکی ہیں۔ 2015ء میں اسرائیلی فوج نے شام میں دو گاڑیوں پر فضائی حملہ کیا تھا جس کے نتیجے میں حزب اللہ کے متعدد جنگجو ہلاک ہوگئے تھے۔اس کے جواب میں حزب اللہ نے سرحدی علاقے میں حملہ کرکے دو اسرائیلی فوجیوں کو ہلاک کردیا تھا۔