ْزمانہ طالب علمی میں جی سی یونیورسٹی کی یادیں میرے دل ودماغ پر نقش ہیں، وزیراعلیٰ پنجاب

لاہور۔ (اُردو پوائنٹ اخبارتازہ ترین - اے پی پی۔ 19 جنوری2017ء) وزیراعلیٰ پنجاب محمد شہباز شریف نے گورنمنٹ کالج یونیورسٹی لاہور کے 15ویں کانووکیشن سے خطاب کے دوران اپنے زمانہ طالب علمی کا ذکر کرتے ہوئے کہا کہ گورنمنٹ کالج یونیورسٹی لاہور ایک عظیم درس گاہ ہے اور میںنے اس عظیم درس گاہ سے تعلیم حاصل کی ہے اور اس زمانے کی یادیں آج بھی میرے دل ودماغ پر نقش ہیں۔

انہوں نے بتایا کہ میں نے گورنمنٹ کالج کے عظیم اساتذہ سے بہت سیکھا ہے اور آج میں جس مقام پر ہوں، بلاشبہ اس میں میرے والدین کی دعائیں اور میرے اساتذہ کی محنت شامل ہے۔ وزیراعلیٰ نے کہا کہ میں آج جس مقام پر ہوں اس میں میرے اساتذہ کابہت بڑا ہاتھ ہے جنہوںنے ہمیں احترام انسانیت کا درس دیا۔میری شخصیت میں نکھار میں میرے اساتذہ کی محنت شامل ہے ،جنہوںنے ہمیں دکھی انسانیت کی خدمت کا درس بھی دیا۔

(جاری ہے)

وزیراعلیٰ نے کہا کہ میرے اساتذہ میں سجاد حید رمرحوم اورشعیب ہاشمی بھی شامل تھے اور میں آج بھی اپنے اساتذہ کا بے پناہ احترام کرتا ہوں اگرچہ ان میں سے کچھ اساتذہ دنیا سے رخصت ہوچکے ہیںتاہم کچھ حیات ہیں ۔ وزیراعلیٰ نے کہا کہ مجھے اس درس گاہ کے ایک ایک کونے سے لگائو ہے اور آج یہاں آکر میری پرانی یادیں تازہ ہوگئی ہیں۔ وزیراعلیٰ نے خوشگوارانداز میں کہا کہ مجھے ملک جوس سنٹر آج بھی یاد ہے جہاں تپتی دھوپ میں ہم ملک شیک اوراورنج جوس پیتے تھے لیکن پیسے کچھ دنوں بعد اداکرتے تھے اوروہ بھی جب وہ ہمیں بار بار یاددہانی کراتے تھے ۔