گلگت بلتستان فیسٹیول کی تیاریاں آخری مراحل میں داخل ہوگئیں

لاہور۔ (اُردو پوائنٹ اخبارتازہ ترین - اے پی پی۔ 23 جنوری2017ء) والڈ سٹی لاہور اتھارٹی اور الحمرا آرٹس کونسل کی جانب سے تین روزہ گلگت ، بلتستان میوزک فیسٹیول کی تیاریاں آخری مراحل میں داخل ہوگئیں۔ 2فروری سے شروع ہونے والے تین روزہ فیسٹیول میں لاہور اور گلگت بلتستان کے کلچر کو ایک دوسرے کے قریب لایا جائے گا۔ والڈ سٹی اتھارٹی کی ترجمان تانیہ قریشی کا کہنا تھا کہ کلچر کا براہ راست انسانی زندگی سے گہرا تعلق ہے۔

(جاری ہے)

کلچر انسان کے تعمیری کردار اور ذوق کی عکاسی کرتا ہے اور بلاشبہ لاہور کا کلچر پوری دنیا میں مشہور ہونے کے ساتھ ساتھ یہاں کے لوگوں کے بہترین ذوق کا عکاس ہے۔ فیسٹیول کے انعقاد کا مقصد بھی کلچر کی اہمیت کا صحیح ادراک کرانا ہے۔تانیہ قریشی کا کہنا تھا کہ فیسٹیول میں داخلہ بالکل مفت ہے ۔الحمرا کے اندر گلگت بلتستان کے روایتی دیہاتوں کا ایک ماڈل ویلج بھی تیار کیا جائے گا جہاں کھانے پینے اور موسیقی کے سٹال بھی لگائے جائیں گے۔ والڈ سٹی لاہور اتھارٹی ثقافتی ورثے کو پروان چڑھانے کے لئے پہلے بھی مختلف سرگرمیوں کا انعقاد کر چکی ہے۔ اس فیسٹیول کا مقصد بھی ثقافتی ورثوں کو متعارف کروانا، قریب لانا اور عوام میں اس کی اہمیت کو اجاگر کرنا ہے۔