ایران میں برطانوی خاتون کی پانچ برس قید کے خلاف اپیل مسترد

لندن ۔ (اُردو پوائنٹ اخبارتازہ ترین - اے پی پی۔ 24 جنوری2017ء) ایران کی ایک عدالت نے ایرانی نژاد برطانوی شہری کی پانچ سال قید کی سزا کے خلاف اپیل مسترد کر دی ۔برطانوی نشریاتی ادارے کے مطابق نازنین زغاری ریٹکلف کو اپریل میں اس وقت تہران ایئرپورٹ سے قومی سلامتی سے متعلق قوانین کی خلاف ورزی کے الزام میں حراست میں لے لیا گیا تھا جب وہ ایران میں اپنے والدین سے ملنے کے لیے گئی تھی۔

حکام نے ان کی دو سالہ بیٹی گیبریلہ کا پاسپورٹ بھی اپنے قبضے میں لے کر اسے نازنین کے والدین کے حوالے کر دیا تھا۔نازنین زغاری کے شوہر رچرڈ ریٹکلف کی جانب سے جاری ہونے والے ایک بیان کے مطابق ان کی اہلیہ کی اپیل عدالت نے چار جنوری کو ایک خفیہ سماعت میں مسترد کر دی تھی اور اس کے بارے میں 22 جنوری کو آگاہ کیا گیا۔

(جاری ہے)

انھوں نے کہا ہے کہ ان کی اہلیہ کی قیدایران پر دھبہ ہے۔

رچرڈ ریٹکلف نے کہا کہ ان کی اہلیہ کے خلاف الزامات کو خفیہ رکھا گیا ہے تاہم اپیل کے دوران ان پر مزید دو الزامات عائد کیے گئے۔ان میں ایک الزام یہ ہے کہ 2009 میں جب بی بی سی فارسی سروس شروع کی گئی تھی تو اس وقت وہ سروس کے لیے ملازمین کو بھرتی کرنے کے شعبے کی سربراہ تھیں۔تاہم نازنین زغاری کے خاندان کے مطابق انھوں نے ایران اور افغانستان کے نوجوانوں کے لیے بی بی سی کے تربیتی پروگرام میں کام کیا تھا لیکن کبھی بی بی سی فارسی میں کام نہیں کیا۔نازنین پر ایک الزام یہ ہے کہ انھوں نے ایک برطانوی جاسوس سے شادی کی لیکن حقیقت میں ان کے شوہر اکاؤنٹنٹ ہیں۔نازنین زغاری کے خاندان کے مطابق انھوں نے کسی بھی قانون کی خلاف ورزی نہیں کی۔