پنجاب پراونشل کوآپریٹو بینک فصلات خریف کیلئے قرضہ جات کی فراہمی یکم اپریل سے شروع کرے گا

اتوار 12 فروری 2017 12:30

فیصل آباد۔12 فروری(اُردو پوائنٹ اخبارتازہ ترین - اے پی پی۔ 12 فروری2017ء) پنجاب پراونشل کوآپریٹو بینک فصلات خریف کیلئے قرضہ جات کی فراہمی یکم اپریل سے شروع کرے گا اور اس مہم کے دوران امداد باہمی کی تنظیموں کے ممبران و کاشتکاروں کو اڑھائی ارب روپے سے زائد کے قرضے جاری کئے جائیں گے ۔

(جاری ہے)

پنجاب پراونشل کوآپریٹو بینک فیصل آباد ریجن کے ذرائع نے بتایاکہ قبل ازیں کاشتکاروں کو فصلات ربیع کیلئے بھی اڑھائی ارب روپے کے قرضے جاری کرنے کا ہدف مقرر کیاگیا تھا مگر مقرر ہ مدت کے دوران کاشتکاروں کودو ارب روپے کے قریب قرضے جاری کئے گئے۔

انہوںنے بتایاکہ بینک کے قرض دہندگان سے فصلات خریف کے قرضوں کی ریکوری بھی بھر پور طریقے سے جاری ہے۔ انہوںنے بتایاکہ تمام بینک حکام کاشتکاروں کو زرعی قرضہ جات کی فراہمی کیلئے بھر پور اقدامات کرہے ہیں تاکہ وہ زیادہ سے زیادہ فصلات کاشت کرکے ملک میں سر سبز زرعی انقلاب لانے میں معاون ثابت ہو سکیں ۔