نوجوانوں کو بابائے قوم کی سوچ سے آگاہ کرنے کی اشد ضرورت ہے

وزیراعظم کے مشیربرائے قومی تاریخ و ادبی ورثہ ڈویژن عرفان صدیقی کی قائداعظم اکیڈمی کے اسلام آباد دفتر کے اچانک معائنے کے موقع پرگفتگو

منگل 14 فروری 2017 16:14

نوجوانوں کو بابائے قوم کی سوچ سے آگاہ کرنے کی اشد ضرورت ہے

اسلام آباد ۔ (اُردو پوائنٹ اخبارتازہ ترین - اے پی پی۔ 14 فروری2017ء) وزیراعظم کے مشیربرائے قومی تاریخ و ادبی ورثہ ڈویژن عرفان صدیقی نے کہا ہے کہ قائداعظم کے افکار و نظریات کے فروغ کے لئے ایک منظم حکمت عملی کی ضرورت ہے تاکہ ان کا پیغام معاشرے کے تمام طبقوں تک پہنچایا جا سکے۔ یہ بات انہوں نے قائداعظم اکیڈمی کے اسلام آباد دفتر کے اچانک معائنے کے بعد سٹاف سے گفتگو کرتے ہوئے کہی۔

عرفان صدیقی نے کہا کہ قائداعظم کی شخصیت اور ان کے ارشادات ہمارے لئے مشعل راہ ہیں۔ اس بات کی اشد ضرورت ہے کہ نوجوانوں کو بابائے قوم کی سوچ سے آگاہ کیا جائے۔ قائداعظم نے جمہوری اقدار کے ساتھ ساتھ معاشرتی رواداری، ہم آہنگی اور ہر قسم کے تعصب سے پاک ہو کر پاکستان کی بے لوث خدمت کا درس دیا۔

(جاری ہے)

عرفان صدیقی نے اکیڈمی کے افسران اور عملے کو تلقین کی کہ وہ قائداعظم پیپرز پر تحقیق کو جاری رکھتے ہوئے ایسی کتابوں کی تیاری پر زیادہ توجہ دیں جو بچوں اور نوجوان طلباء و طالبات کی فکری تربیت کر سکیں۔

قبل ازیں مشیر وزیراعظم نے بغیر پیشگی اطلاع اکیڈمی کے دفاتر کا دورہ کیا۔ انہوں نے اس امر پر اطمینان کا اظہار کیا کہ تمام سٹاف اپنے اپنے کام میں مصروف تھا۔ اس موقع پر سیکرٹری قومی تاریخ و ادبی ورثہ ڈویژن عامر حسن اور جوائنٹ سیکرٹری سید جنید اخلاق بھی ان کے ہمراہ تھے۔